Shillong, Nailar, 27: Ki don haduh 3332 hajar tylli ki School Managing Committee (SMC) jong ki skul SSA kiba don ha ka Jylla Meghalaya kiba la ai ïa ka No Objection Certificate (NOC) lane ka jingmynjur ban aiti pynïaid noh ïa la ki jong ki skul sha ka tnat Pule Puthi jong ka Sorkar Jylla.
Ïa kane la pyntip da u President ka Meghalaya SSA School Association (MSSASA) Bah Aristotle C. Rymbai hadien ba la wai ka jingïalang bad u Commissioner Secretary ka tnat Pule Puthi u Vijay Mantri bad ki nongïalam ka MSSASA, ka All Meghalaya Fourth Teachers Association (AMFTA) bad ka All Meghalaya SSA School Teachers Association (AMSSASTA).
Ha ka jingïakren bad ki lad pathai khubor u Bah Aristotle ula ïathuh ba napdeng ki 3332 tylli ki Managing Committee kiba la ai ïa ka NoC ki long 298 tylli kiba dei ki skul SSA kiba la pynïaid da ki Balang bad ki riewshimet katba 3034 tylli ki dei kiba pynïaid da ki shnong.
Ha Meghalaya ki don 5191 hajar tylli ki skul SSA kynthup ki Upper Primary bad Lower Primary School.
“Ha kaba ïadei bad ka jingdawa jong ka seng ba ka Sorkar ka dei ban wanrah noh da ka Pay Scale na ka bynta ki nonghikai skul SSA, ngi sngewkmen ban ïohsngew ba u Commissioner and Secretary u la pyni ha ngi da ka Presentation kaba la ki la pynkhreh ïa ka jingtyrwa bad shen hadien ka Dorbar Synrai ïa ka jingtyrwa yn sa phah sha ka tnat Pla Tyngka ba kan bishar bad hadien kata yn sa phah pat sha ka Kynhun Myntri ba kan ai jingmynjur,” la ïathuh u Bah Aristotle.
U la ïathuh ba u Commissioner and Secretary u la pyni ruh ïa ka Cabinet Memorandum ha kaba ïadei bad ka jingshimti ïa ki skul kiba la pynpaw ïa ka mon ba ki kloi ban aiti ïa ka Management na ka SSA sha ka Sorkar khnnag ba ïa kane ka Cabinet Memorandum yn sa phah sha ka Kynhun Myntri hadien ka Dorbar Synrai.
U President ka MSSASA u la ïathuh ba ha ka jingïalang la pyntip ruh ba ka jingpynkynriah ïa ki nonghikai na ki skul kiba duna ki khynnah pule sha ki skul kiba kham bun ki khynnah pule kaba la sdang ha ki katto katne ki district ka jylla.
“Kiwei pat ki mat kiba ngi la ïakren ki long halor ka jingdonlang jong ki jait skul bapher bapher ha kawei ka building ne ka campus. Halor kane, ngi la ïakren ha kaba ïadei bad ka jingsiew ïa ka tulop jong ki nonghikai SSA. U Commissioner and Secretary u la kren da kaba shai bad ai ruh ka jingkular kan ym ktah satia ïa ka jingsiew ïa ka tulop sha ki nonghikai skul SSA hynrei kan long beit sha ka Account jong ki nonghikai skul SSA na ka ophis jong ka Samagra Ahiksha Abhiyan (SSA),” la pyntip u Bah Aristotle.
