Shillong, Nailar, 28: U Bah Paul Lyngdoh uba long u Myntri bad u Nongaiktien jong ka Sorkar Jylla u la ong ba ka jingtyrwa jong ka sorkar ban siew tulop ïa ki nongtrei jong ki lai tylli ki Autonomous District Council ka long ban pyllait ïa ki na ki jingeh kaba ki mad ha ka jinghiran pisa.
Ha ka jingïakren bad ki lad pathai khubor ha ka sngi Palei u Bah Paul u la ong ruh ba ka jingïarap pisa ka dei kaba la shu tyrwa da ka sorkar bad kam dei satia ba ka sorkar kan shu ai da ka Blank Cheque ïa ki lai tylli ki Autonomous District kiba don hapoh ka rilum Khasi, Jaiñtia bad Garo bad kaba kham kongsan ka long ba ki dei ban pynthymmai ïa ki rukom treikam, ban pynduna ïa ka jingdon jong ki nongtrei bad ban kham pynkhlaiñ ïa ka jingïoh lum khajna.
“Lada ki dang ïai bteng ban treikam ha kane ka dur bad ka rukom lum khajna nalor ka jingthung nongtrei palat kin khyllem tang hapoh lai bad saw snem,” ula ong.
“Shwa ba ngin poi haduh uta u pud, kane ka dei ka jingtyrwa ba phin dup lah ban khie khlieh. Na ka bynta kane, ngi ai jingkyrshan pisa ïa phi ba phin tip kumno ban buh jingkheiñ thik pa thik ïa ka jingïoh lum khajna na kaba ka Sorkar ka ai jingïarap ïa phi.
“Ngi hap ban kren ruh ba balei ki ADC ki donkam ban don ïa ki nongtrei haduh 1500 ngut. Kam long satia kaba pynksan bad phi hap ban pynduna mar shiteng,” u la bynrap.
“Nga ïaiban biang ba kane ka sienjam jong ka sorkar jylla ka long namarba ki ADC ki shaniah ha ka Sorkar Jylla ban siew ïa ka bhah khajna kaba ïoh lum na ki marpohkhyndew. Ngi long kiba laitluid, bad ha kum kane ka khep, ngi shem ba ki ADC ki la jan poi ha u pud ba kin khyllem. Ngi hap ban ai jingim bad kane ka jingim ka dei kaba ka Sorkar ka tyrwa,” la ong shuh shuh u Bah Paul.
Halor ka jingtyrwa jong ka Sorkar, u Bah Paul u la ong ba ka Sorkar kam lah ban shu long tang kum ka nongpeit kai haba ka District Council ka la don ha u pud ban khyllem noh.
