Shillong, Nailar 29: U Commissioner & Secretary u ba khmih ïa ka tnat Tourism u Bah Cyril Diengdoh u la ong ba ka committee ba la thaw da ka sorkar ban khmih halor ki jingdawa jong ki tourist taxi association, ka la wanrah bun ki jingai jingmut ba kynthup ïa ka jingpynduna ka dor bai pynïeng kali hapoh ka Guwahati Airport.
U la pynshlur ïa kine ki seng ban pynpaw ïa kino kino ki mat kaba ki don bad ka sorkar ban ïasyllok bad ki ha ka rukom kaba dei.
Kane ka jingong jong u ka la wan hadien ba dang shen ka la don ka jingïakhih shong kyllaiñ myngor ba la khot da ka All Khasi Meghalaya Tourist Taxi Association (AKMTA) ha kaba ka la dawa ïa ka sorkar ban pyrkhing ïa ki tourist taxi na ka shabar ka jylla ba kin kamai ne kit ïa kiba wan jngohkai shaduh ki jaka jngohkai kiba don ha kylleng ka jylla.
“Ki la don bun ki jingïalang kiba la pynlong bad kine ki seng bad ki la don bun ruh ki mat ba la ïakren da kaba bniah naba kane ka donkam ka jingïasyllok lang jong baroh ki nongshong shnong, ym tang bad ki seng kiba ñiah taxi, bad kumjuh ruh kiba bun ïa ki hotel bad kiwei kiwei. Kane ka committee ka la dep ïakynduh la bun sien bad baroh ki rai ne ki jingïakren la dep ban sam bad kine ki seng. Ngi la wanrah katto katne ki jingai jingmut kum ka nuksa ka jingpynduna dor ka bai pynïeng kali ha Guwahati Airport naba kane kadei kawei na ki jingdawa naba ki ong ba ka la rem shaba palat ka dor. Kumta ka tnat ka la khmih ïa kane ka kam bad kan sa shim ka rai bad kynthup ruh ïa kiwei pat ki mat ba ki don, nga tharai ba kan bha ba kin ïakren bad ka sorkar bad ngin sa ïasyllok bad ki ha ka rukom kaba dei,” ïathuh u Bah Diengdoh sha ki lad pathai khubor ha ka sngi Thohdieng.
Haba kylli la ka don kano kano ka jingdawa kaba lah ban ktah kylla, u Commissioner & Secretary u la ong ba kine ki kam hap ban peit na baroh ki liang naba ki don bun ki kam kiba don bynta bad kumjuh ruh ka jingdon bynta lang jong kiwei ruh ki nongshong shnong.
“Kumta kano kano ka rai kaba la shim hap ruh ban long phikir bha, hap thew hap woh bad ban peit ruh ïa ki jingshah ktah kiba lah ban don bad namar kata ka committee ka la peit ia kiba bun ki lynti kaba ngin lah ban pynbeit ïa kine ki kam bad hap ïasyllok ïa ki jingtip ba bniah balei ka long kaba eh ban pyntreikam ïa katto katne ki jingai jingmut kaba ki la shim halor kine ki kam,” u la ong.
