Shillong, Nailur, 01: Ka Khasi Student’s Union (KSU) Langkynma Unit ha ka Lah Sngi u Blei hapoh ka jingïalam u Vice President u samla Micheal Diengngan ki la leit ban kyndang naphang ïa ki bar jylla kiba trei hapoh ki Coke Factory kiba don ha ka thaiñ Nongjri, South West Khasi Hills District bad ban pynher krad ïa ki bar jylla ki bym don ïa ki kot ki sla kiba biang.
Ha ka jingïakren bad ki lad pathai khubor u General Secretary ka seng u Samla Rockyfeller Dkhar u la ong ba ka jingthmu jong ka seng ban khynra ïa ki Coke Factory ka long kum shi bynta ban khanglad ïa ka jingwan rung tuh ki bar jylla sha kane ka thaiñ bad kaba kham kongsan ka long ban peitngor ruh ïoh don ki mynder Bangladeshi kiba rieh tngen da kaba trei bylla ha kine ki karkhana kaba lah ban buh jingma ïa ka thaiñ kumba la jia ha kine ki khyndiat bnai ba ladep.
Ha kane ka jingkhynra watla ka seng kam shym la lap ïa ki mynder Bangladeshi hynrei ka lap pat ïa kiba bun ki bar jylla kiba wan ïalam ryngkat ïa ki tnga bad ïa ki khun ki kti nalor ba kim don ïa ki kot ki sla kiba biang ïa kiba ka seng ka la beh krad sha ka shnong ba ki wan.
