Shillong, Nailur, 01: Ka Behdeinkhlam kaba ju long shisien shisnem jong ka Sein Raij Mukhla bad kaba khatduh eh ban pyndep na baroh ki Raij ha Rilum Jaiñtia, ka la poi noh sha kaba kut ha ka 31 tarik Nailar, 2025.
Mynta ka kynti kane ka lehniam Behdeinkhlam kan long ruh ka jingsah kynmaw namarba u Myntri Khynnah ka Sorkar Pdeng uba khmih ïa ka Ministry of Development of North Eastern Region u Dr. Sukanta Majumdar, u la ïasoh lang kum u kongsan lyngba ka video conference bad u la plie paibah ruh ïa ki 6 tylli ki jingtei ne ki cultural infrastructure project kiba shongdor T.1.93 klur ha East Jaiñtia Hills bad ha West Jaiñtia Hills District.
Kine ki 6 tylli ki projek kiba la bei pisa da ka North Eastern Council ki long na ka bynta Sein raij Tuber, Ïalong, Mukhla, Muthlong, Kongwasan Chyrmang, bad Sohkympbor.
Ki kynrem ki lyndang kiba LA sakhi lang ha kane ka sngi ki kynthup ïa u Symbud Myntri Rangbah ka Jylla u Bah Sniawbhalang Dhar uba la long kum u symbud kongsan ryngkat u Myntri Sorkar u Bah Kyrmen Shylla, u nongai buit ka sorkar jylla u Bah Lahkmen Rymbui bad kiwei kiwei ki MLA ba kynthup ka kong Santa Mary Shylla, u Bah Damanbait Lamare, u Bah Wailadmiki Shylla, u Sunil V. Deodhar, u Secretary ka North Eastern Council u S.K. Bhalla, u President jong ki Sein Raij Jaiñtia u Bah Phrangki Pale nalor kiwei kiwei.
Ha kane ka sngi la pyllait paidbah ruh ïa ka Vision Document 2028 ba la pynkhreh da “Ki Raij Jaiñtia” bad la pynkut ïa ka Behdeinkhlam da ka jingwanrah ïa ki 14 tylli ki rong ha ka pung Ait Nar.
