Shillong, Nailur, 05: Ka jingïalang ba la khot da ka Khasi Students’ Union, Laban Circle ïa ki phra tylli ki Dorbar kiba don ha ka thaiñ Laban, Shillong ha ka sngi Palei ka la shim ïa ka rai ban ym shah shuh ïano ïano ruh ban ai iing wai ïa ki briew ki bym dei na ka Bri u Hynñiewtrep hapoh ki phra tylli ki dorbar shnong.
Ha ka jingïalang la ïashim bynta da ki Rangbah Shnong, Secretary Shnong bad ki Executive Member jong ka Dorbar Shnong Madan & Riat Laban, Dorbar Shnong Laban, Dorbar Shnong Lawsohtun, Dorbar Shnong Upper Lumparing, Dorbar Shnong Lower Lumparing, Dorbar Shnong K.O.R, Dorbar Shnong Kynjat Phutbot bad Dorbar Shnong Lumshatsngi ryngkat ka jingdonlang jong ki Pulit ka Laban Police Station bad ka Rilbong Beat House.
Ka rai ha kane ka jingïalang kaba la long ha Karbi House, Laban, la ïakren halor ka jingbuhai shnong ki phetwir hapoh ki shnong ki thaw bad ki lad jingïada ba lah ban shim na ki liang jong ki Dorbar Shnong.
Ha u kyrwoh ba la phah sha ki lad pathai khubor ka KSU ka la pyntip, “ba ha ka jingïamir jingmut la shim ïa ka rai ban ym shah shuh ïa kino kino ki briew ki bym dei napoh u Bri Hynniewtrep ban ïoh ïing wai hapoh kine ki phra tylli ki Dorbar Shnong khlem da ïoh jingbit na ka Shnong. Kane kan kynthup ruh ïa kiba trei bad kiba shong basah hapoh ki Guest House bad ki dukan bapher bapher bad kumjuh ruh ïa ki nongbylla bar jylla kiba wan trei bad sah ha ki jaka trei ka jong ki.”
“Ki trai ïing/ trai dukan/ trai guest house/ kontraktor ki dei ban bud thik ïa ki Adong Shnong halor kane ka bynta bad lada don kino kino ki trai ïing kiba pynkhein ïa kane, yn pynshitom ïa ki katkum ka rai jong ka Dorbar bad lada donkam ka shnong ka lah ruh ban pyntip sha ka seng ne ka tnad Pulit ban leh ïa kaba donkam,” la bynrap u kyrwoh.
Ka seng ka la kyntu ruh ba ki dorbar shnong ki dei ban pyntip ïa kane ka rai sha ki paidbah lyngba ki kor jingsawa.
“Ki Dorbar Shnong ki don la ka jong ka rukom treikam (mechanism) ban pynrung kyrteng (register) ïa ki nongshong shnong hynrei donkam pat ai ïa kino kino ki kot jingpynshisha (ID ne kiwei kiwei) hadien ba la pynshisha ïa ki kot ki sla ka jong ki (verification) khnang ban lah ban pynïapher hapdeng ki nongshong kiba pura bad kiba shu wan buhai shnong beaiñ bad hap ban kiar na ka jingai kot pynshisha ïa ki briew ki bym don ka EPIC na ka jylla Meghalaya,” la bynrap u kyrwoh.
“Ki bor pynïaid shnong lada lap ïa kino kino kiba sah be-aiñ hapoh ka shnong kin shim ïa ka sienjam ban pynmih ïa kum kine ki briew bad lada donkam ka shnong ka lah ruh ban pyntip sha ka seng ne ki tnad Pulit ban leh ïa kaba donkam,” la ong u kyrwoh.
