Shillong, Nailur, 05: Hadien ba ka la don ka jingshah tuh ki thuk thuk ar shaka kylleng ka East Khasi Hills District bad na katto katne na nongbah Shillong, ha ka sngi Palei ha ka por kumba 3:30 baje mynstep, katba ki Pulit ka Mawryngkneng Police Station ki dang pynlong ïa ka jingtalasi ïa ki kali ar shaka ha Mawmang, Mawryngkneng, kawei ka Scooty kaba wan na Shillong tang shu ïohi ïa ki Pulit ka la phaidien bad phet bak.
Ha u kyrwoh ba la phah da u Superintendent of Police ka East Khasi Hills Bah Vicek Syiem ha ka sngi Thohdieng u la pyntip ba ki Pulit kiba la pynlong ka jingpynap shrip ha ka por kumba 3:50 baje mynstep, kajuh ka Scooty ka la wan phai biang ban ïaid lyngba kane kajuh ka lynti.
Tang shu ïohi ïa ki Pulit u nongñiah u la pyrshang ban phet bad ka jingbeh thong, ki Pulit ki la ïoh bat ïa u Nehlang Lamare, 24 snem ka rta uba sah ha ka shnong Barato, West Jaintia Hills katba u nongñiah u la lait phet da kaba shim kabu ïa ka jingdum.
Ïa ka Scooty kaba don ïa u nombar ML05 X 5909 la lap ba la iehnoh ha surokbah, Mawryngkneng bad ïa uba la shah kem bad ïa ka Scooty la ïalam noh sha Mawryngkneng Police Station bad ki Pulit ki la thwet ban ïohkem ïa u nongñiah. Ha ka por 5:15 baje mynstep ki Pulit ki la ïohbat ïa uba lait phet uba la tip kyrteng kum u Klement Timung, 18 snem ka rta uba sah ha Caroline, Jowai, West Jaintia Hills na Lad Lwang, Mawryngkneng.
U SP u la ïathuh shuh shuh ba ha ka jingtohkit, la lap ba ïa ka Scooty la tuh na Lapalang, Shillong bad ïa ka case la register ha Rynjah Police Station hapoh ka Section 305(b)/303(2) (3) BNS.
Ha ka por mynsngi, lai ngut ki nongtuh kiba dei ban shimti ïa ki thuk thuk ba la tip kyrteng kum u Peter Pohrmen, 18 snem uba sah ha Umdoh, Dawki, u Vicky Dkhar, 20 snem ka rta uba sah ha Bakur, Dawki, bad u Romeo Ryngksai, 24 snem ka rta uba sah ha Bakur Dawki, West Jaiñtia Hills District ki la shah kem ha ki Pulit ka Special Cell jong ka East Khasi Hills na Nongtalang, West Jaiñtia Hills District. Kine ki lai ngut ki dei kiba donkti ban pynpoi ïa ki thuk thuk ba la ïoh rong tuh sha ki snar nongtuh kiba dei ki mynder na ka ri Bangladesh.
Na ka jingphla jong ki lai ngut, ki Pulit ka East Khasi Hills bad ka West Jaiñtia Hills ki la pynlong ka jingkhynra lang ha ka miet 4 tarik Nailur, 2025 bad 5 tarik, Nailur, 2025 bad ïoh kem ïa ki snar nongtuh bad ïa kiba shimti ïa ki thuk thuk ba la ïoh rong tuh.
Kiba la shah kem ha kane ka jingdonkti ban tuh ïa ki thuk thuk ki long u Deimionjongmi Paslein, 25 snem uba sah ha Kseh, East Jaiñtia Hills, u Barister Lamare, 20 snem bad u uwei khynnah uba dang 15 ka rta kiba sah ha ka shnong Barato, West Jaiñtia Hills bad u Last born Lamare, 21 snem ka rta.
Nalor kine, ki snar nongtuh kiba dei ki mynder Bangladeshi kiba shimti ïa ki thuk thuk ba shu tuh ki dei kiba la tip kyrteng kum u Kawsar Mia, 40 snem, u Ali Hussain, 40 snem, u Md.Rafig Miah 28 snem kiba dei ki nongshong shnong jong ka Sonamganj district, Bangladesh, u Md Jil Miah, 30 snem, u Monnan Miah, 38 snem, u Md. Rumel Miah, 20 snem, u Md.Shabaj Miah, 24 snem kiba dei ki nongshong shnong jong ka Sylheti District, Bangladesh, u Ridial Hussain, 19 snem uba sah ha Tangan District Bangladesh, u Samiya Mia, 25 snem uba sah ha Hobiganj District, uwei khynnah uba la 17 snem ka rta.
U SP u la pyntip ba ïa kine ki 17 ngut ki briew kynthup ruh ïa ki 2 ngut ki khynnah rit yn sa tian bishar ha Kashari.
Ha kawei pat ka jingjia, u SP u la pyntip ha ka 4 tarik, Nailur, 2025 ki Pulit ki la ioh pdiang ia ka jingujor ba kawei ka scooty rong blue kaba don ia u nombar ML05-AD-0582 ka la shah tuh na Mawlai Nongkohlew. Mar mar ki Pulit ki la register case ha Mawlai Police Station hapoh ka Section 305 (b) BNS. Da ka jingtohkit kaba bniah jong ki Pulit ka Mawkynroh Out Post la lap biang ia ka Scooty ba la shah tuh bad ki Pulit ki la kem ia ki arngut ki snar nongtuh thuk thuk ba la tip kyrteng kum u Stevenson Mawlein bad ia u Richesstar Kharumnuid na ka shnong Mawsiatkhnam.
