Shillong, Nailar, 05: Ki Pulit ka East Khasi Hills District kiba la pynlong ia ka jingtohkit kaba bniah halor ka jingshah pyniap u Raja Raghuvanshi uba dei u nongkhaii na Indore ha Arliang Riat Kunongrim, Umblai hajan ka wei sawdong Sohra, ha ka sngi Thohdieng ki la aiti sha ka Kashari Judicial Magistrate 1st class ka Sohra sub Division Court ia ka charge sheet kaba 790 sla ryngkat bad ki tiar ba la ioh kurup kum ki sakhi satar.
Ki Pulit ki la pynngat ia ka Sonam Raghuvanshi, ia u Raj Singh Khuswaha, u Aanand Kurmi, u Vishal singh Chauhan bad ia u Akash Singh Rajput hapoh ka Section 103(1)/238 (a)/61 (2) BNS.
U kyrwoh ba la phah da u Superintendent of Police ka East khasi Hills u Bah Vivek syiem u la pyntip ruh ba ki pulit kin sa aiti ruh sha ka Kashari ia ka Supplementary Charge Sheet pyrshah ia ki lai ngut kiba la shah kynnoh tang shu ioh ia ka kaiphod na ka forensic.
Halor kane ka jingjia ki Pulit ki la kem ruh ia u Lokendra Tomar, u Balla Ahirwar bad ia u Shilom James na Gwalior halor ka jingdonkti ban pynduh pyndam ia ki sakhi sabut ba la pyndonkam da ka Sonam bad ki saw ngut ban pyniap ia u Raja Raghuvanshi ha ka jingleitkai honeymoon sha Nongriat ha u bnai Jymmang, 2025.
