Shillong, Nailur, 08: Ka Khasi Students Union (KSU) Ranikor Circle ha ka Lah Sngi u Blei ka la kam ba u Rana Ahmed uba dei u trai jong ka City Palace Inn kaba don ha ka shnong Lapalang, Shillong u dei u mynder Bangladeshi uba shongkha ïa ka jaidbynriew Garo ha ka shnong Rajapara, South West Khasi Hills District.
Kane ka jingmih shakhmat jong ka KSU ka long hadien ka jingïoh kurup jong ki Pulit ka kynhun Anti Narcotic Task Force (ANTF) ka East Khasi Hills ïa ki dawai kuli Yaba na ka Hotel City Palace ha ka shnong Lapalang ha ka 3 tarik, mynta u bnai hadien ka jingïoh kurup ïa ki dawai kuli Yaba na ka kali Renault Duster kaba don ïa u Number ML05 R 6828 ha Saw Lad, Madanrting, Shillong.
Ha ka jingtalasi ïa ka kali, ki Pulit ki la lap 595.07 gram u dawai Amphetamine ne u Yaba uba don kumba 6000 tylli, na kawei ka pla kaba la buh hapoh ka kali. La kem ïa u trai jong kane ka pla u Salnang M Sangma bad la register sase pyrshah ïa u.
U Sangma u la phla ba ki dawai kuli ki dei kiba long trai da u trai jong ka City Palace Inn kaba don ha Lapalang. Ha ka jingkhynra, ki Pulit ki la lap sa 4000 tylli ki dawai kuli Yaba kiba khia 399 gram bad kem ruh ïa u Labius Arengh uba dei u kynum jong u trai Hotel.
“La slem ngi la buddien ïa u Rana Ahmed uba dei u nongshong shnong ka ri Bangladesh. Kane kam dei shuh ka sien banyngkong ba un ngat ha ka case khaii drok. Katkum ka jingïakren bad ki nongshong shnong ka Rajapara, ka shnong kaba u shongkha ïa kawei ka jaidbynriew Garo, u dei uba la shah kem teng ha Delhi bad u la shah set along ha Kolkata. Hangtei u wai Hotel kumne hi ban khaii drok,” ong u President ka seng u samla Marconi Thongni.
“U la don ruh ïa ka EPIC bad kiwei kiwei ki kot ki sla ban ïoh long nongshong shnong ka ri India. Ngi sngew lyngngoh ba wat ki bor synshar ka South West Khasi Hills District ki tip bha ïa kane hynrei ngi sngewlynngoh ïa kata. Ngim tip kumno u ïoh ïa ki kot ki sla,” la bynrap u samla Thongni.
“Ngi kyntu ïa ki bor district bad ïa ka sorkar bad haba don kum kine ki jingujor,” u la ong.
“Ym dei tang u Ahmed hynrei ki dang don kiwei ruh na ka ri Bangladesh kiba shongkha ha Rajapara kiba khaii drok tangba ki don kiba la shah kem teng ha ki shipai BSF bad aiti sha ki Pulit bad ynda la leit khynra ym shym la lap eiei na ka iingsah jong ki bad ki la lait noh,” la ïathuh u President ka KSU Ranikor Circle.
“Kaei kaba ngi tip na ka liang jong ka seng, ngi kyntu ïa ki Pulit ban thwet ïa u Rana Ahmed,” u la ong shuh shuh.
U la ïathuh ba ka seng ka la ïatakhuh bad u Rana Ahmed namar ka jingleh baheh.
“Ngi ïoh jingtip na ki nongshong shnong ka Rajapara, ki la ïathuh ba u dei u Gang ha Bangladesh bad u sah kham jnai na Sonamganj,” u la ong bad kam ruh ba u Ahmed u leh baheh kylleng kylleng.
U la ong ruh ba ka jingmih shakhmat jong ka Seng ka long ban pyntip wat ïa ka Dorbar Shnong Lapalang ba u Ahmed u dei u mynder Bangladeshi bad ïa ki paidbah ka jylla.
“Ki bor synshar district ki dei ban thwet mardor bad ban kem mardor ïa u. Ka jingshim sting jong ka Sorkar ka long ka jingma lada shu ailad ïa ki mynder ri ban ïaid laitlan,” u la bynrap shuh shuh.
