Shillong, Nailur, 09: U Myntri ka Sorkar Jylla uba khmih ïa ka tnat Social Welfare u Bah Paul Lyngdoh ha ka sngi Baar u la ong ba ka Sorkar ka la ïakhun thma pyrshah ïa ka jingma kaba ap na u drok da kaba kut jingmut ban pynduhjait ïa u.
“Ngi leh da kaba tyngeh, ngi dang buddien ïa ka jingïakhun ban khanglad bad nga ngeit skhem ba ngin lah ruh ban pynduh jait ïa u drok,” la ong u Bah Lyngdoh haba jubab ïa ka Special Motion ba la wanrah da u MLA ka VPP na Nongkrem u Bah Ardent Basaïawmoit bad u MLA ka VPP ba la shah sospon na North Shillong u Bah Adelbert Nongrum halor ka jingjyllei jong ki nongdih drok bad ki briew kiba ïabit ïa ka jingpang HIV ha ka jylla.
U Bah Lyngdoh u la pyntip ruh ba hapoh shi phew sngi la ïoh kurup ïa u drok uba shongdor T. 4 klur na Jaiñtia Hills bad 1 klur na Shillong.
Ha kaba ïadei bad ka jingïalang ba la pynïaid da u Symbud Myntri Rangbah ka jylla u Bah Prestone Tynsong ha u bnai Naitung ban ïakren halor kane ka mat, u Myntri u la ong ba tang u Bah Nongrum uba la don lang na ka VPP ha ka jingïalang.
“Nga kwah ban kdew kyrpang ïa ka jingdon jong u Bah Adelbert Nongrum ha kata ka jingïalang. Nga kwah ban kylli ïa ka jingdon jong uba rah ïa ka Motion bad u dkhot na Mawlai bad na Mawrynkneng Constituency ha kaba kane ka jingeh ka dei kaba la thnem bha,” u la ong.
Haba pynpaw ïa ki sienjam ba kongsan ban ïakhun pyrshah ïa ki jingdih pynbuaid, u Bah Lyngdoh u la pyntip ba dei hadien 25 snem naduh ba la mynjur ïa ka PITNDPS da ka Parliament ha u snem 1988 ba ka Sorkar Meghalaya ka la pynrung ïa ki kyndon jong kane ka aiñ bad pyntreikam ïa ka ha ka jylla Meghalaya.
“Mynta ka sngi katba ngi dang ïakren, ki don 5 ngut ki nongkhaïi drok kiba ju mlien ban khaiïi drok kiba dang shah set hapoh ki phatok ha ka jylla Meghalaya,” u la ong bad bynrap, “Nga sngewtynnad ban kdew shai ïa ka aiñ, ka e Prevention of Money Laundering Act bad ban kdew kyrpang ba kum kane ka kyndon ka don ruh ha ka PITNDPS na ka bynta ban set ïa ki jingdon jingem jong ki bahaïing hasem ba ïajan jong ki briew ba shah kynnoh bad ka khanng ïa ki Bank Account ym tang jong ki briew ba la shah kem hynrei wat ïa u ne ka bahaïing hasem bajan jong ki.”
U la pyntip ba ka Sorkar ka la thaw ïa ka Anti- Narcotics Task Force (ANTF) Police Station ban tohkit bniah ïa ki case NDPS bad PITNDPS.
12 tylli ki ANTF Unit ladep thaw hapoh ka jingkhmih jong ki Superintendents of Police ban pynthikna ba leh da kaba tyngeh pyrshah ïa ka jingkhaii drok.
Ha ki san snem ba la leit noh, u Bah Lyngdoh u la ïathuh ba 603 tylli ki NDPS cases ladep ban register, 1069 ngut kiba shah kynnoh ki la shah kem bad bun bah ki jingdih pynbuaid ba la ïoh kurup.
“Ka tnad Pulit ka la buh hakhmat ruh ban pynduh ha ka por kaba biang ïa u drok ba la ïoh kurup. Ha ka 23 tarik u Kyllalyngkot, 2025, la pynduh pyndam ïa ki jait drok na ki 56 tylli ki Case ha ka pajwa jong ka Star Cement ha Lumshnong ba kynthup ïa u drok, u crystal meths bad ki dawai jyrhoh,” u la bynrap.
Shuh shuh u Bah Lyngdoh u la pyntip ba ka Sorkar ka la pynpaw ruh ïa ka jingdonkam ban don ïa ki Rehabilitation bad ki jingpynshai paidbah ban ïakhun pyrshah ïa u drok.
Ki don 12 tylli ki Rehabilitation Center kiba la don lypa ha ka jylla, kynthup ïa kawei ka Rehabilitation Centre na ka bynta ki nongdih drok ba la im kyrni ha Mawdiangdiang, kaba la kyrshan da ka tnad Social Justice and Empowerment.
Ka Sorkar ka la ïatreilang ruh bad ki tnad bapher bapher bad ki seng treimon sngewbha ban pynshai paidbah halor ka jingma jong u drok bad ïa ka jingpang HIV/AIDS .
62 tylli ki seng treimon sngewbha kiba la ïoh jingïarap ban pynlong ïa ki jingïalap pyrshah ïa u drok, kaba la poi sha palat 15,639 ngut ki briew.
Ka Sorkar ka la ïasoi ïa ka MoU bad ka Society for Promotion of Youth and Masses na ka bynta ban ai jinghikai ïa ki nonghikai ban pyntreikam da ka tnad Pule Puthi.
