Shillong, Nailur, 09: Ki seng saiñ pyrthei kiba shong ha ka Liang Pyrshah ki la rai ban ym pynieng kyrtong na ka bynta ka elekshon Deputy Speaker ka Iingdorbar Thawaiñ ka jylla ka ban sa long ha ka 12 tarik mynta u bnai.
U Nongïalam ka Liang Pyrshah u Dr. Mukul Sangma u la ïathuh ha ki lad pathai khubor ha ka sngi Baar ba ka jingïakren hapdeng ka All India Trinamool Congress (AITC) bad ka Voice of People Party (VPP), ka la poi sha ka jingshim ïa kane ka rai kaba ïahap jingmut lang ban ym pynieng kyrtong.
“Nga dang shu ïoh ïakren bad ki paralok jong ngi ha ka Liang Pyrshah ba kynthup ïa u President ka VPP u Bah Ardent Miller Basaïawmoit. Ha kaba kut ka jingïakren ka la poi sha ka jingïamynjur lang ban ong ba ngin ym pynieng kyrtong. Ai ba kan don ka jingjied ïa u Deputy speaker khlem jingïakhun,” la ong u Sangma.
U Sangma ong ba ka kynhun jong ka Liang Pyrshah kan sa phah ktien ïa ka rai ba ki la shim sha u Lamphang jong ka Iingdorbar Thawaiñ.
“Ka long ruh kaba dei, ngi pynsngew ïa kane kajuh sha u Lamphang bad kham mynshwa ruh ha ki por ba la leit noh kam shym la don ka jingïakhun ha ka jingthep vote ban jied ïa u Deputy Speaker,” u la ong.
Haba kylli halot ka lah neem ban mih ka jingbym shaniah shuh ïa ka Sorkar, u Sangma u la jubab da kaba ong “Em.”
“Ïa ki jingeh lah ban pynpaw pyrthei da kaba shim kabu ïa ki kyndon bapher bapher ba la bsut hapoh ka Rules of Procedure and Conduct of Business bad kiwei kiwei ki kyndon jong ka riti synshar ka ri. Haba ngi sngew biang ba katto katne ki lad ki lynti kiba kum kata ka jingheh ki hap ban shim ngin sa pyntip sha phi hynrei na ka bynta kane ka dorbar te em (ngin ym pynkhih pyrshah ïa ka Sorkar),” u la ong.
Ka jingpynlong ïa kane ka elekshon ka long hadien ka jinghiar shuki jong u MLA ba la rim ka NPP na Resubelpara Constituency u Timothy D. Shira ha ka Lah Sngi U Blei.
