Shillong, Nailur, 09: U Symbud Myntri Rangbah uba khmih ïa ka tnat Kam Pohing u Bah Prestone Tynsong u la pyntip ba ki Pulit ha ryngkat ki bor synshar shnong bad ki nongïalam shnong ki la tuklar mardor bad la lah ban tehlakam bad pynjem noh ïa ka jinghuri hura kaba la mih na ka jingïakynad kaba la jia dang shen ha Jaïaw Pdeng Shillong.
U la batai ruh namar ka jingïatreilang bad ka jingpynbeit ryntih bad ki nongshong shnong, ym shym la shim ba ka long kaba donkam ban ujor ejahar.
“Namarba ngi la ïatreilang bad ki bor synshar shnong kaba mut bad ki paidbah nongshong shnong, ngi la ïakren bad ha kaba kut ngi la pynbeit ïa ka jingeh da ka jingïasuk. Kumta kam long kaba donkam ba ngin ujor ejahar ne ba ki dei ban ujor ejahar namar ha kaba kut kumba nga la ïathuh ïa phi na ki Pulit ryngkat bad ki Rangbah Shnong jong kane ka shnong ki don bynta lang ha kane ka jingïakren,” la ong u Bah Tynsong ha ka jingïakren bad ki lad pathai khubor.
