Shillong, Nailur, 09: U Symbud Myntri Rangbah ba khmih ïa ka tnat Kam Pohing u Bah Prestone Tynsong u la bthah ïa ki Pulit ka jylla ba kin leh da kaba tyngeh ïa ki briew kiba pyndonkam bakla ïa ka iktiar khlem da ïoh jingbit.
“Ngi la ai jingbthah sha ka Police Headquarter bad kumjuh ruh sha ki SP ba kin leit tohkit ïa kiba pyndonkam beaiñ, la ka long ki jingtah iit iong
ne ka jingpyndait siren beaiñ ne la ka long kano kano ka bym long katkum ka kyndon ba la buh katkum ka Sorkar,” la ong u Bah Tynsong haba kren sha ki lad pathai khubor ha ka sngi Baar.
Kane ka jingkren jong u Bah Prestone ka long hadien ka jingshah kem ba dang shen jong ki briew kiba ak ïalade ki pulit pahara bad ka jingïoh kurup ïa ki Airgun na ki kali remdor.
Ha kaba ïadei bad ki jingkynnoh ba u rangbah ba la shah kem u lah ban ïakhun elekshon, u Symbud Myntri Rangbah u la pynpaw ïa ka jingsngew artatien da kaba ong ba um ngeit ïa kane ka jingkren bad um tip ïa kano kano ka tyllong kaba kum kata.
“Ngam tip nangno phi ïoh ïa kata ka tyllong khubor. Nga dang pyrshang ruh ban kylli ïa ki paralok politishian jong nga hato phi ïajan neem bad une u briew hynrei ym don ba tip satia. Namarkata, wat shu pynkut da kata ka jingkren ba la kren da uno uno u briew uba ngam tip. Kaei kaba nga pyrshang ban ïathuh ïa phi kam pher la phi ïajan bad u A ne u B ne u C ne u D uba don ha ka bor hynrei phi hap ban ïaid katkum ki kyndon ba la buh,” u la ong.
