Shillong, Nailur 09: Ka jylla Meghalaya ka mad ïa ka jingduna kumba 67,500 tylli ki kam ha ki tnat sorkar. Ïa kane la ïathuh da u Myntri Rangbah ka jylla u Conrad K Sangma hapoh ka Ïingdorbar bad u la ong ba ka sorkar ka la pynkhreh ïa ki rukom pyrkhat kam ban khmih ïa kane ka jingeh.
Katkum ka jingong jong u, ki don kumba 70,000 ngut ki samla kiba lah ban trei manla u snem, hynrei ki shnat treikam jong ka sorkar kim lah ban pynbiang wat tang 2,000- 2,500 ki kam manla ka snem.
“Ka don ka jingduna ki kam kumba 67,500 ha ki shnat treikam jong ka sorkar, bad dei halor kane ba ka sorkar ka la pyrkhat ban ai kam ïa kumba 70,000 ngut ki samla ba kin lah ban trei,” u la ong haba jubab ïa kane ka bynta.
U Sangma u la pyntip ruh ba ki don kumba 7000 tylli ki kam kiba lait ha ki shnat treikam sorkar ha kaba ki kam ban thepkam ki dang ïaid mynta.
U Myntri Rangbah u la ong ruh ba ka career counselling programme ka la sdang bad ka Meghalaya State Skill Development Society (MSSDS) ka dei ka nodal agency. Ïa kane ka programme yn pyntreikam lyngba ki 34 tylli ki counselling centre, ha kaba ki nongai buit kum ki career adviser kiba la shah hikai kin ai ki lad jingïarap bad ki jingïasyllok ïa ki samla.
Halor kane na ka liang jong u nongïalam ka liang pyrshah u Mukul Sangma u la pynpaw ka jingïaroh halor kane ka jingsdang bad banjur pat ïa ka jingdonkam ban pynïohkam ha ki shnat treikam ki kam ïada ri bad ki kam shipai.
Na ka liang u Myntri Rangbah u la pynthikna ba kane ka programme ka long ban ïarap ïa ki samla ban ai ki lad jingkyrshan.
U Conrad Sangma u la ïathuh ruh ba ka sorkar ka la buh ki lad ai kam kaba long shi bynta na ka Vision 2030 jong ka.
U la ong ruh ba tang na ka kam jngohkai la khmih lynti ba kan pynmih ïa kumba 54,000 tylli ki kam, kiba long ruh lyngba ki jingkiew ki five-star hotel, bad ki jingdonkam ïa kiba ñiah kali bad kiwei pat ki nongtrei.
