Shillong, Nailur, 10: U Myntri ka Sorkar Jylla uba khmih ïa ka tnat Pule Puthi u Rakkam A Sangma u la pyntip ba ka Shillong Government College of Engineering ka la sdang ïa ka Academic Session ha ka 25 tarik, Nailur, 2025 bad 58 ngut ki samla pule la pdiang ha kane ka College.
Ka Captain Williamson Sangma State University ka ladep ban sdang ïa ka Academic Session kaba nyngkong ha ka jaka pule ba pura ha Tura bad ha ka Regional Campus kaba don ha Shillong, u la ong ha ka jingai jubab ïa ka jingkylli ba la wanrah ha ka Ïingdorbar thawaiñ ha ka sngi Balang.
U Myntri u la pyntip ba ka jingshna ïa ka iing ka la dep 95% bad ka dang ïaid ruh shakhmat.
Ka Sorkar ka la mang ban pynkha 36 tylli ki post bad ka Institution ka ladep ban pyndap lypa ïa ka shuki Principal bad LDA ban pyntyllun shakhmat ïa ka kam naduh ba la sdang ka samoi pule.
