Shillong, Nailur, 10: U Myntri Rangbah ka jylla u Conrad K Sangma u la kyntait ban kren eiei la kan don neem ka jingbujli shuki ha ka Kynhun Myntri da kaba pynpaw ba ka dang don ka jingïashong dorbar kaba dang ïaid shakhmat.
U Sangma u la pynpaw ba un sa pyntip sha ki lad pathai khubor halor ki bynta bapher bapher kynthup ïa ka jingbujli shuki myntri ynda la kut ka dorbar.
“Ka dang kloi palat ban ong eiei mynta, ngi dang don hapdeng ka dorbar kaba dang ïaid mynta. Hadien ka dorbar nangta ngan sa pyntip ïa phi baroh,” u la ong ha ka jingïakren bad ki lad pathai khubor.
Ha kaba ïadei bad ka jingpynieng ïa u Limison D. Sangma kum u kyrtong Deputy Speaker, u Sangma u la pynthikna ba u Sangma u dei u kyrtong ba la mynjur lang jong ka kynhun Meghalaya Democratic Alliance (MDA).
U la ong ba ka party ka la ïakren ïa kane ka jingpynrung kyrteng bad ki nongïalam bapher bapher bad la shim ïa ka rai ba u Limison kum u MLA ba la rim bad ka jingshemphang jong u ha ka Sorkar bad ha Ïingdorbar Thawaiñ ka pynlong ban jied ïa u kum u kyrtong uba biang ban ïakhun ïa ka shuki Deputy Speaker.
“Ngi la ïakren bad ki nongïalam bapher bapher na ka party bad hadien ka jingïakren ngi la sngew ba u dei u briew uba la kham rangbah bha bad da kaba buh ha ka jingmut ïa ka jinglong rangbah jong u bad kumjuh ruh ïa ka jingshemphang jong u ha ka Sorkar bad ka Ïingdorbar ngi sngew ba un long u briew uba biang ban shimti ïa ka shuki Deputy Speaker,” la ong u Myntri Rangbah.
