Shillong, Nailur 12: Ka jingthmu jong ka sorkar ban pynkynriah ïa ka Central Reserve Police Force (CRPF) camp na ki 4 tylli ki jaka kynthup na Mawlai, sha kawei ka jaka kaba don ha New Shillong Township ka la kylla long pulom noh na ka daw ka jingsngewtieng bad pyrshah na ki dorbar shnong.
“Ha ka jingshisha ha u snem 2022, ngi la dep ka rai ba ïa kine ki 4 tylli ki jaka sah ba shipor jong ki CRPF dei ban pynkynriah noh. Ha u Jymmang 2022, ngi la mut sa tang ban ai ka jaka kaba 10 acre ha New Shillong Township hynrei ha shwa ban soi ïa ka memorandum of understanding (MoU) katto katne ki shnong ki la pynpaw ki jingpyrshah ban buh ïa ka jaka sah ki CRPF,” ong u Symbud Myntri Rangbah u ba khmih ïa ka tnat Home (Police) Prestone Tynsong haba jubab ïa ka jingkylli ba la wanrah da u MLA ka VPP na Mawlai u Bah Brightstarwell Marbaniang ha Ïingdorbar ha ka sngi Thohdieng.
U Bah Tynsong u la pynthikna ba un ïakren ïa kane ka kam bad ki Rangbah Shnong bad dorbar shnong naba kane ka jaka la buh na ka bynta ka camping site jong ki CRPF ha Shillong.
U la pynthikna ruh ba ka sorkar ba ka la dep ban ai ka jaka 50 acre sha ka Meghalaya police na ka bynta ka Meghalaya Security Complex.
U Bah Tynsong u la pynshai ba ki CRPF ka ïapher na ki shipai ka sorkar pdeng bad la buh halor ki jingdonkam kiba manla ka sngi.
U Banjur ba ki CRPF ki long hi kum ki battalion ka jylla, ba la pyndonkam ha kiba bun jingjia ba manla ka sngi.
Ka jingdon ki nongtrei ka CRPF ha Shillong bad Tura ka duna ban ïa ka 400 ngut, kumta ka don hapoh ka jingpynïaid jong ka sorkar jylla.
U Bah Tynsong u ka kyrpad ruh ïa ki dkhot ka ïing ba kin pynphriang ïa ki jingai jinghikai sha ki constituency shaphang ki CRPF, da kaba kyntait ruh ïa ki jingshah ïalam bakla ba ki long kum ki BSF ne Assam Rifles.
Ka jaka ki CRPF camp kan neh bad ka sorkar, bad la kyrpad ïa u MLA ka Mawryngkneng ban ïarap pynsngewthuh ïa ki paidbah halor ka kam ki CRPF.
Kham hashwa haba wanrah ïa kane ka mat, u Bah Marbaniang u la ong ba ka CRPF camp ha Mawlai ka la long ka bynta ka jingsngewtieng hapdeng ki nongshong shnong haba ka la don ka jingpynkynriah noh ïa ki ha u snem 2021.
Ha u snem 2022, ka la don ka jingjia hajan ka jaka sah ba shipor ki CRPF ha kaba kane ka la wanrah ka jingkulmar kaba la pynlong ïa ki shnong ban kynduh ïa u Symbud Myntri Rangbah bad ïa u Myntri Rangbah ka jylla da kaba ong bad pynkynmaw ba ka sorkar ka pynthikna ïa ki ban pynkynriah noh ïa ka jaka sah ba shipor na Mawlai.
