Shillong, Nailur 12: Ka Meghalaya ka la ïohi ïa ki jingjia ba kongsan ba shah thombor ki khynnah kiba hap hapoh ka Protection of Children from Sexual Offences (POCSO) Act, haba la don kumba 1562 tylli ki mukutduma ba la register ha ka jylla ha kine ki 5 snem ba la leit.
Ki la don baroh 261 tylli ki jingjia ba la register ha u snem 2025, 265 tylli ha u snem 2024, 320 tylli ha u 2023, 347 ha u 2022 bad 369 tylli ha u 2021.
Ia kane la iathuh da u Myntri ka tnat Social Welfare u Bah Paul Lyngdoh haba jubab hapoh ka Ïingdorbar ha ka sngi Thohdieng.
U la pyntip ba baroh ki kam, bad ki mat ba ïadei bad ka jingïada ïa ki khynnah, ka jingkyrshan ïa ki, ki jingïasyllok, ki lad ai jingsumar bad kiwei pat ki kam shakri ki hap hapoh ka tnat social welfare, kaba la pyntreikam da ka Mission Vatsalya Scheme, kaba don ka State Child Protection Society (SCPS) ha ka State Level bad ka District Child Protection Units (DCPUs), Children’s Home bad Child Helpline, ki Child Welfare Committee bad Juvenile Justice Board ha ki District level.
Ka sorkar ka don ïa ki nongtrei ba biang bad ka pisa ban ai ki lad shakri babha sha ki khynnah.
Baroh ki jingthung ïa ki nongtrei hapoh ka Mission Vatsalya ka long da ka jingtrei contract.
