Shillong, Nailur, 15: Ka Sorkar Jylla ka la leh burom khatduh ha ka Lah Sngi u Blei ïa ka met ba dang sah jong u Myntri Rangbah barim ka Jylla u Dr. DD Lapang.
Ha ka jingleh burom kaba la long ha madan Student, Jaïaw, la sakhi lang da u Myntri Rangbah ka Jylla u Conrad K. Sangma, ki Myntri ka Sorkar Jylla, u Nongïalam ka Liang Pyrshah u Dr. Mukul Sangma, ki MLA, MDC, ki ophisar, ki bahaing hasem bad ki paralok kiba wan bad najngai.
Hadien ba la pyndep ïa ka jingleh burom la pynkit pat ïa ka met sha u lum jingtep jong ka Balang Presbyterian ha Jaïaw ban tep donburom.
U Dr. Lapang u la khladnoh ha ka sngi Thohdieng ka taiew baladep ha Bethany Hospital, Shillong ha ka rta kaba 93 snem. Ha u snem 1958 u la shong kurim ïa ka Kong Amethyst Lynda Jomes Blah.
Kum ban shu pyntip, la kha ïa u Dr. Lapang ha ka 10 tarik, Ïaiong, 1932. U la long ruh u Myntri Rangbah ka Jylla Meghalaya saw sien kynthih.
U la sdang ïa ka jingim kum u nongtrei bylla sngi ha surok bad da ka jingtrei shitom u la long u Sub-Inspector of Schools.
Ha u snem 1972, u la shah jied kum u MLA na Nongpoh kum u kyrtong Independent, ha kata ka por ba la phiah noh ïa ka Jylla Meghalaya na ka Assam. Hadien kata, ha u snem 1992 haduh u Rymphang, 1993 u la long u Myntri Rangbah ka Jylla Meghalaya. Ha ka 4 tarik, Lber, 2003 u la bam smai biang kum u Myntri Rangbah. U la resaiñ na ka shuki Myntri Rangbah ha ka 15 tarik, Jylliew, 2006 na ka daw ka jingïapher jingmut hapoh ka sorkar khleh khawlang.
Sa shisien u la bam smai biang kum u Myntri Rangbah ha u Lber, 2007. Ka party jong u, ka Indian National Congress ka la ïoh ïa ka jingjop kaba bun paid ha ka elekshon kaba la long ha u Lber, 2008 bad u Dr. Lapang u la bamsmai kum u Myntri Rangbah ha ka 10 tarik, Lber, 2008, hynrei namarba u la ïoh jingkyrshan tang na ki 28 ngut ki dkhot jong ka ingdorbar kaba 60 ngut ha Iingdorbar Thawaiñ, u la hap ban resaiñ noh ha ka 19 tarik, Lber.
U Dr. Lapang u la shimti biang kum u Myntri Rangbah ha ka sien kaba saw ha ka 13 tarik, Jymmang, 2009 hadien ba ka Jylla ka la don hapdeng ka jingsynshar President na ka bynta ar bnai kynthih bad u la resaiñ biang ha ka 19 tarik, Ïaiong, 2010.
Hadien 40 snem ba u la don bad ka Congress party, u Dr. Lapang u la mih noh na ka Congress ban leit pynïasoh bad ka National People’s Party ha u snem 2018. U la shah thung ruh kum u Chief Advisor jong ka Sorkar Meghalaya.
.
