Shillong, Nailur, 15: Ka Khasi Students Union (KSU) Nongthymmai Circle ka pynrem jur ïa ki riewthrang snam kiba la dkhat jubor ïa ka jingim jong i hep Insaphira Lyngdoh Mawnai iba la jah ha ka step Sngi U Blei na phyllaw iing na Nongrah Nonglum, Shillong bad ïa ka met jong i la lap ha ka step Lah Sngi U Blei na kawei ka iing ba dang shna ha kane hi ka shnong.
Ha u kyrwoh ba la phah sha ki lad pathai khubor, ka KSU ka la dawa ïa ka tnat Pulit ban pynlong ïa ka jingtohkit kaba bniah tad haduh ban da ïohkem ïa ki nongleh kam bymman kumba ka tnat Pulit ka la duh thiah duh dem tad haduh ban da ïohkem ïa ka Sonam bad ïa ki paralok kiba donkti ban pynïap ïa u Raja Raghuvanshi ha Sohra.
“Ka seng hi kam lah khlem da pynpaw ïa ka jingbitar ïa ki riewthrang snam bad ka phah ruh ïa ka jingsngewlem sha ki kmie ki kpa jong i heprit Insaphira,” la ong ka seng.
“Kumta ka seng ka phah ïa ka kyrwoh sha ka Sorkar lyngba ka tnad Pulit ba kin shimkhia mardor ïa kane ka kam ban kem ïa ki nongleh kam bymman. Kumba phi la trei shitom bad trei borbah ban ïohkem ïa ka Sonam bad ki paralok kiba pynïap ïa u Raja Raghuvanshi ha Wei Sawdong, Sohra, kumjuh ngi kyrmen skhem ba phin thwet kloi ïa ki riewthrang snam kiba donkti ban dkhat jubor ïa ka jingim jong i heprit Insaphira khnang ban wanrah pat ïa ka shongsuk shongshngaiñ ha ki shnong ki thaw bad ka thaiñ hi baroh kawei,” la kyntu ka KSU ïa ka Sorkar.
“Namar kine ki kam pyntriem ki la sdang paw pyrthei ha ki shnong bapher bapher, ka seng ka kyntu ruh ïa ki kmie ki kpa ban husiar bha ïa la ki jong ki khun ki kti,” la kyntu ka Seng.
