Shillong, Nailur, 15: Kawei ka longkmie bar jylla bad ar ngut ki khun kynthei jong ka la lap ba ki la thiah ïap hapoh ka iing sah jong ki ha Green Colony, Topcem Cement Limited, Thangskai, East Jaiñtia Hills ha ka sngi U Blei.
Ïa kane ka longkmie kaba la khladnoh la tip kyrteng kum ka Rippa Das, 24 snem ka rta katba ki arngut ki khun kynthei ki dei kiba la tip kyrteng kum i Punchami Das, 8 snem ka rta bad i Arpita Das, 3 snem shiteng.
Kane ka longïing ka dei na ka shnong Baratali kaba hap hapoh ka Kalain Police Station kaba don ha Cachar district, jong ka jylla Assam.
Katkum ka jingïathuh jong ki Pulit, ha ka jingkren bad u kurim jong ka longkmie kaba la khlad u Apon Das, 35 snem ka rta u la ïathuh ba u la mih ban leit trei hadien ba u la dep bamja sngi ha ka por 2:00 baje noh sngi ha ka sngi u Blei hynrei ynda u la wan phai na ka jaka bylla ha ka por kumba 5:50 baje janmiet u la lap ba ka kamra ka la khang na shapoh bad da ka jingïarap jong ki para marjan la lah ban kyndang ïa ka jingkhang bad kumba iuh tdong bsein u la lap pynban ïa la ka kurim kaba la sdien ha u tyllai phasi uba la sop da ki jaiñ ha ka pangkha katba ki arngut ki khun kynthei ki la khlad lang ha jingthiah.
Mar mar u Apon Das ula pyntip sha ki bor pahara jong ka Topcemt. Ki Pulit ki la register case ruh halor kane ka jingjia bad ka jingtohkit mynta ka dang ïaid shakhmat.
