Shillong, Nailur, 16: Tang hapoh khyndiat kynta ba la bam smai kum u Myntri ba thymmai, u MLA jong ka Hill State People’s Democratic Party (HSPDP) na Mawshynrut Constituency u Bah Methodius Dkhar u la kular ba ka party jong u kan ïai bteng ban buddien ïa ki mat ba la sah pongding la slem bha kiba ïadei bad ka jingpynbeit ïa ka jingïakajia pud bad ka Jyllla Assam, ban pyntreikam noh ïa ka Inner Line Permit (ILP) bad ka jingpynrung ïa ka ktien Khasi ha ka Khyrnit Baphra jong ka Riti Synshar ka Ri India.
“Lyngba kane ka Sorkar, ngin pyrshang ban pynkhih ïa kine ki jingdawa ba kongsan jong ka party,” la ong u Bah Methodius ha ki lad pathai khubor ha ka sngi Baar.
U Bah Methodius u la pynpaw ïa ka jingsngewnguh ïa ki paidbah ka Mawshynrut Constituency bad ïa ka West Khasi Hills, da kaba ong ba ka jingpynrung Myntri na ka Constituency bad ka thaiñ ba la jlan palat 20 snem kan ai mynsiem ïa ki paidbah nongshong shnong jong ka thaiñ.
“La palat 20 snem, ngim shym la ïohlad ban don ha ka Kynhun Myntri. Nga kyrmen lyngba ka jingshah pynrung jong nga ha ka Kynhun Myntri, kan ai mynsiem ïa ki paidbah jong ka West Khasi Hills bad ka Mawshynrut Constituency,” u la bynrap.
U la ai khublei ruh ïa ki nongïalam jong ka party khamtam eh ïa u Myntri ba la hiar shuki u Bah Shakliar Warjri uba la plie lynti ban pynrung ïa u ha ka Kynhun Myntri.
“Nga kitbok kitrwiang ïa u (Warjri) ba un nang kiew shaphrang,” la ong u Bah Methodius haba pynthikna ban ïatreilang bad u bad ka party kum ka kynhun.
