Shillong, Nailur 18: Ka Seng ki Nonghikai Skul Adhoc ha Meghalaya ka “Federation of All School Teachers Of Meghalaya(FASTOM), ka la pynlong ïa ka General Meeting jong ka, ha ka tarik 13 tarik Nailur 2025 ha Dobasipara Hr. Secondary School, Tura ha kaba ka la ïoh ban ïatai sani bha ha kaba ïadei bad ki mat jingdawa jong ka, kaba la phah sha ka sorkar Meghalaya naduh ki snem ba kham mynshwa ter ter haduh 2022, 2023, 2024 ban kyntiew (upgrade) Deficit noh ïa baroh ki Adhoc Skul ha Meghalaya naduh Lower Primary, Upper Primary, Secondary bad haduh Hr. Secondary School.
Halor kane ka Federation ka la ïatai sani bha ruh ha kaba ïadei bad ka State Education Commision ba ka sorkar ka la thaw ha ka snem 2022 da ka jingthmu ban peit ïa ki jingdawa bad ki jingeh jong ki Seng bapher bapher kynthup ïa ki jingdawa jong ka Federation, hynrei phewse, katkum ba paw hi, ha kitei ki lai snem shiteng ei ei ka sorkar ka khlem leh ei ei ruh em ha kaba ïadei bad ki jingdawa jong ka Federation bad kumba ka paw shai hi, ka shu don tang ka Discussion Paper kaba khlem ïakren ei ei ruh em ïa ki mat jingdawa ba la ai jingmut sha ka Commission la kum ba lai ne saw sien eiei.
Ha u kyrwoh lyngba u Bah E.G War, Publicity Secretary ka FASTOM ka la ong halor jong kine ki nongrim jong ka jingleh kuman bad bym pynsngap jong ka sorkar, ka General Meeting ba la long ha katei ka sngi ha Tura da kawei ka sur ba jam ka FASTOM ka la shim ïa ka rai ban pynlong noh da ki jingïakhih ban mih biang sha surok kum ka dak ban pynpaw ïa ka jingbym sngew hun ïa ka jingleh mynthi jong ka sorkar.
Ka jingïakhih kaba khlem buh por kan sdang da kaba pynlong shuwa ïa ka March Rally ka ban sdang na Madan Malki,Shillong ha ka tarik 22 tarik Nailur ha ka por 11 baje mynstep bad ka jingïakhih kan ïai bteng beit haduh ba ka sorkar kan pyntreikam noh ïa ki mat jingdawa ban kyntiew deficit noh ïa baroh ki skul Adhoc ha Meghalaya.
Kumjuh ha ka thaiñ Garo Hills pat ka jingïakhih kan sdang da kaba shong kyllaiñ myngor ha ka 24.09.2025 ha Tura ha ka por 11 baje mynstep.
