Shillong, Nailur, 19: U MLA jong ka NPP na Kharkutta u Rupert Momin u la ong ba ki paidbah ka rilum Garo ki la dawa ba dei ban pynïasoh ïa ka lynti Rel na Mendipathar sha kiwei kiwei ki bynta jong ka thaiñ kynthup ïa ka East Garo Hills bad ka South Garo Hills.
“Kane ka long namar lada ngi don ïa ka rel, ka kit ka bah kan long kaba tad bha bad ngin ïoh ruh bun ki lad ki kabu khamtam ha kum kane ka mynta kaba ngim da don than ki lad ïohkam,” ong u Momin ha ka jingïakren bad ki lad pathai khubor ha ka sngi Thohdieng.
Katkum ka jingong jong u, ka rel kan pynmyntoi haduh katta katta ïa ka ïoh ka kot, kum kaba kit ïa ki mar rep bad ki marpohkhyndew, ki ban pynmyntoi haduh katta katta ïa ki nongrep bad ïa ki nongkhaii.
Haba kylli ïa ka jingrung kyrthep jong ki briew kiba nabar na ka daw ka jingdon jong ka Mendipathar Railway Station, u Momin u la ong, “ka jingbun briew ïa mynta ka duna bha. Kiei kiba wan bad kiei kiba leit, ngi lah ban ïohi tyngkreiñ bad ngam ïohi ba kan don ka jingma na kata.”
U la ong ba ha ki thaiñ khappud, kum ka iew Mendipathar, Dainadubi bad kiwei kiwei ki bynta jong ka West Garo Hills, ki dei kiba kham don jingma na ka jingwan rung jong ki mynder.
“…kito ki jaka ki dei kiba kham don jingma bad haduh mynta kam don ka jingwan rung kyrthep ki mynder bad ngi lah ban ong ba ngi hap ban long kiba peitngor..”
U la kdew ruh ba ka jingshna surok bad ïa ka jingkieng dang shen na Dhubri sha Phulbari ka la pynsngewkhia bha namar ka jingkharoi ki briew ha kine ki jaka.
U Momin u la banjur ïa ka jingdonkam ban husiar, khamtam ha ki jaka kum ka Phulbari bad Rajabala, kiba lah ban mad ïa ka jingkiew ha kino kino ki kam ynda ladep ïa ka jingtrei.
