Shillong, Nailur 20: Ka Sorkar Jylla ka la pan jingïarap pisa T. 664.49 klur na ka Sorkar Pdeng ban kyrshan ïa ka Garo Hills Autonomous District Council (GHADC) kaba la mad ïa ka jinghiran pisa hapoh ka Agreed Text of Settlement ba la ïasoi bad ka Achik National Volunteers Council (ANVC) bad ka ANVC-B, ki sengkieng atiar kiba la shah kheiñ beaiñ.
Na kane, ka Sorkar ka la pan ruh ïa ka jingkyrshan pisa kaba T. 252 klur na ka bynta ban pyllait ïa ka tulop jong ki nongtrei GHADC kaba la sah pongding mynta la 43 bnai.
Ha ka shithi ba la phah sha u Secretary ka Ministry of Home Affairs (MHA), u Commissioner & Secretary uba khmih ïa ka tnat Planning, Investment Promotion and Sustainable Development u Dr Vijay Kumar D u la ong,, “ka GHADC namar kata ka la dawa ka pisa kaba T. 664,49,27,382/- na ka bynta ki kam bad ki jingdonkam jong ka Council, na ka bhah jong ka Additional Financing and Special Project kaba hap hapoh ka Agreed Text for Settlement hapdeng ka Sorkar Pdeng, ka Sorkar Jylla bad ka ANVC & ANVC-B. Namarkata nga kyrpad ïa phi ban sngewbha ban pyrkhat lem da kaba ai ïa ka pisa kaba la mynjur na ka bynta ka jingdonkam pisa ïa ka Council kaba long katkum ka Agreed Text of Settlement.”
U la ïathuh ba ka Ministry of Environment Forest and Climate Change (MoEFCC) ka ladep ban mynjur ïa ki projek kiba ïadei bad ki kam khlaw ha kaba ka jinglut kan kot T. 308,14,27,382 klur.
Ki Detailed Project Report (DPR) kiba ïadei bad ka jingbuh ïa ki Solar Street Light, ka Development of Rural Markets, bad ka jingkyntiew ïa ka kam rep soh bad kiwei kiwei la dep ban aiti da ka jingmang tyngka kaba kot baroh T. 104.34 klur.
“Shuh shuh, na ka daw ka jinghiar palat ka jingïoh lum khajna jong ka Council kam shym la lah ban pyndap ïa ka jingdonkam ha kaba siew ïa ka tulop na ka bynta ki nongtrei bad dei halor kane ba ka la don ka jingkyrpad kaba shisien ïa ka jingïarap pisa kaba long T. 252,01,00,000 ba la buh da ka Council,” bynrap u Dr Kumar.
