Shillong, Nailur, 20: Da ki spah ngut ki paidbah ba kynthup ïa ki rangbah, ki longkmie, ki samla bad ki heprit jong ka shnong Umlyngka, Upper Shillong ki la ïashim bynta ha ka jingthang mombati kum ka dak ka jingsngewlem halor ka jingdkhat jubor ki riewbymman ïa ka jingim jong i heprit Insaphira Lyngdoh Mawnai, 4 snem ka rta.
Kum ban shu pynkynmaw, i heprit Insaphira i la jah rngai na phyllaw iing ha ka 14 tarik, Nailur, bad ïa ka met jong i la lap ha ka 15 sngi tarik Nailur ba la pynthiah ha ka um kaba lang ha kawei ka iing ba dang shna kaba jngai tang kumba 100 mitar na ïingsah i heprit bad ba la ban ïa ka met da u maw.
Ki Pulit ka Rynjah Police Station ki la register case hadien ba la ïoh pdiang ïa ka ejahar na ki bahaiing hasem.
Ki Pulit ka East Khasi District kiba la thaw da ka Special Investigation Team (SIT) ba la khlieh da u SP (City) Bah Herbert Kharkongor tang hadien lai sngi ba la pynlong ïa ka jingtohkit kaba bniah ki la kem ïa uwei u heprit uba dang 13 snem ka rta halor kane ka jingjia uba sah marjan bad i heprit Insaphira.
Ïa ka jingïalang thang mombati kaba la long ha Lailad Kynton, Umlyngka la pynbeit da ka Sengbhalang ki Kynthei Umlyngka, Upper Shillong ryngkat ka jingïatreilang bad ka Dorbar Shnong Umlyngka ba la ïashim bynta lang da u Rangbah Shnong u Bah Treki Lakiang, u Rangbah Dong Kynton u Bah Living Lyngdoh Tron bad kiwei kiwei.
Dang khyndiat sngi ka Dorbar Shnong Nongrah da ka jingïasnoh kti lang bad kiwei Dorbar Shnong, ki sengbhalang ki la pynlong ïa ka jingthang mombati sngewlem kynthup ruh ka KSU Mawkhar Circle bad ka Seng Samla Mawlai Pyllun.
Haba jingkren ha ka jinglang kaba lyngkot u Rangbah Shong ka Umlyngka u la ong ba ka shnong ka thaw ka shong syier,, ka tieng ka smiej na ka jingdon ki riewthrang snam.
“Ka Dorbar Shnong ka pynrem jur ïa ki riewbymman bad ki bor ka aiñ ki dei ban ai ka jingpynsajia kaba tyngeh ïa kiba donkti,” u la ong.
Ka President jong ka Sengbhalang ki Kynthei Umlyngka ka Dr. (Ms) G. Hanabala Kharbuki ka la ong kum ki kynthei ki pait ka dohdud bad ki pang ka mynsien haba ïohi kumne kine ki jingjia kiba pynsuhjer ïa ka imlang ka sahlang khamtam eh haba ki kmie ki kpa kim lah ban ïohsngew ïa ka sur ïam jong i khun ha ka khyllipmat ba i la dkhut mynsiem khatduh.
Kum ban shu pyntip, u kpa jong i heprit Insaphira u dei u nongshong shnong jong ka shnong Umlynka u Bah Gowel Lyngdoh Mawplang uba la poi shongkha sha ka shnong Nongrah Nonglum, Dong Brei.
