Shillong, Nailur, 20: Ka Hynniewtrep Youth Development Council (HYDC) ha ka sngi Saitjaiñ ka la pynher da ka jingthoh sha u Secretary jong ka Ministry of Environment, Forest and Climate Change (MoEFCC) ban pynpaw ïa ka jingpyrshah kaba jur halor ka jingpynmih ïa ka Office Memorandum kaba weng noh ïa ka jingpynsngew paidbah ha kaba ïadei bad ka jingtih ïa ki marpohkhyndew ba kongsan ha ka ri kynthup u Uranium.
“Ka HYDC ka pyrshah jur ïa ka Office Memorandum (OM) ba la pynmih dang shen da ka Ministry of Environment, Forest and Climate Change (MoEFCC) kaba weng noh ïa ka jingpynlong ïa ki jingpynsngew paidbah na ka bynta ban tih ïa ki marpoh khyndew ba kongsan ba la pynmih ïa ka jingpynbna hapoh ka Environmental Impact Assessment (EIA),” ong ka seng ka dorkhas ba la phah sha u Secretary ka MoEFCC.
“Ka rai ban weng noh ïa ka jingpynsngew paidbah ka pyntroiñ ïa ka hok jong ki trai ri trai muluk, khamtam eh ïa ki jylla kum ka Meghalaya, ha kaba ki paidbah ki shaniah ha ka khyndew ka shyiap, ka um ka wah, bad ki khlaw ki btap na ka bynta ka jingim bad ban im. Ka jingïasyllok ïa ki paidbah ka long kaba donkam katkum ka riti synshar paidbah khnang ban pynthikna ba kum kita ki projek kiba heh kin ym ktah ïa ka koit ka khiah, ïa ki sawdong sawkun ka mariang bad ïa ki hok tynrai jong ki riewlum ritpaid,” la ong ka Council.
Haba maham ruh ba kan mih ka jingpyrshah kaba jur na ki paidbah, ka Council ka la bynrap da kaba ong, “ngi pynpaw ruh ïa ka jingpyrshah kaba jur ïa kano kano ka jingpyrshang ban khlong ïa ki marpohkhyndew kiba kongsan na ka jylla Meghalaya. Kum kita ki jingkwah kin ïatakhuh ïa ka jingpyrshah kaba jur na ki paidbah, namarba ki bh jingma ïa ka jinglong jingman jong ki sawdong sawkun ka mariang.”
“Ha kaba ïadei bad kane, ka HYDC ka kyrpad donburom bad kyntu tyngeh ïa ka Sorkar India ban pyllait ïa ka jylla Meghalaya na ka jingshah kynthup ha ka Office Memorandum,” la ong ka Council bad bynrap, “kano kano ka jingtyrwa ban tih ïa ki marpohkhyndew ha ka jylla ka long kaba donkam ban da ïaid da ka lynti kaba shai bad kaba da ïasyllok lang ïa ki paidbah khnang ban sngew ban sngap bad ban burom ïa ka sur jong ki riewlum ritpaid.”
“Ngi kyrpad ba phin tuklar mardor ïa kane ka kam na ka bynta ka jingïada ïa ka mariang bad ïa ka hok jong ki paidbah ka jylla Meghalaya,” la pynkut ka Council ïa ka dorkhas.
