Shillong, Nailur, 21: U Cherian Momin, uba long u nongtrei mon sngewbha na rilum Garo u la kam ba ka North-Eastern Hill University Teachers’ Association (NEHUTA) ka la long mawjynthud bad ka pynwit ïa ka jingkiew arted jong ka North-Eastern Hill University (NEHU), Tura Campus,
Ha u kyrwoh, u Cherian u la pynpaw da ka jingsngewkhia halor kane ka mat bad kynnoh ruh ba ki kam jong ka NEHUTA ki la ktah ïa ka jingkiew shaphrang jong ka NEHU, Tura Campus bad ki samla kiba pule ha kane ka skulbah.
U la kynnoh ruh ba ka NEHUTA ka la shu pynmih ïa ki jingkynnoh ki bym don nongrim kiba long ka daw kaba ktah pat ïa ka jingkiew jong ka NEHU, Tura Campus.
U la ong ruh ba ka jingkam jong ka NEHUTA ïa ka jyrsieh ba 94 klur ka dei ka bym don nongrim bad ka bym don ki sakhi sabut ki ban pynshisha.
La ïathuh ba ka Tura Campus ka la ïoh ïa ka mang pisa kaba T. 45 klur na ka Ministry of Tribal Affairs (MoTA) na ka mang tyngka kaba kot T. 94 klur ban pynbiang shuh shuh ïa ki jingdonkam jong ka Campus. Hynrei la kynnoh pat ba ka don ka jingpynwit ha kaba pyntyllun ïa ka projek.
Nangta la kynnoh ruh ba ka NEHUTA ka la khang ruh wat ïa ka jingïakynduh jong ka Executive Council kaba long kaba donkam na ka bynta ban shim rai bad ïoh ïa ka jingmynjur.
U Momin u la kyntu ïa u Vice-Chancellor jong ka NEHU u Prof PS Shukla ba un lum noh mardor ïa ka Executive Council ban ïatai bad ai jingmynjur noh ïa ki projek kam pynroi ba la mang.
