Shillong, Nailur, 22: Watla ka tnat Pulit ka ladep pynmih ïa ki jingpynbna na ka por sha ka por ban maham ïa ki paidbah ba kin long kiba phikir bad kiba husiar khnang ban lait na ka jingduhei khamaka ka pisa kaba ki la kamai shitom da ka umsyep hynrei ki dang don pat kiba dang ïai ngat ha ka jingpynap shrip da ki riewshukor.
Kane ka la jia hadien ba kawei ka kynthei kaba shong basah ha nongbah Shillong ka la ujor sha ki Pulit ban pyntip ba ha ka 14 tarik mynta u bnai ha ka por kumba 7 baje janmiet, ka la khñiot ïa kawei ka Link jong kawei ka Advertisement ba la thoh ‘work from home’ kaba paw ha Instagram bad mar mar ka la ïoh pdiang ïa u kyrwoh kaba don bad ka Link ban leit sha ka Telegram. Khlem pynslem marmar ka la leh kumba la bthah.
Hadien kane, la bthah ïa ka ban ïakren bad ki briew bapher bapher lyngba ka Telegram, bad phah ïa ki Scanner bad la siew T. 1,000 da ka jingkular ba kan ïoh pdiang ar shah ïa ka pisa tang hapoh shisngi. Da ka jingshaniah ka la leh kumba la bthah bad siew ïa ka pisa kaba kot T. 94,000 hajar. Hynrei, kam shym la ïoh pdiang satia ïa ka pisa kaba la kular bad la bthah ba kan siew shuh shuh ïa ka pisa, ha kaba ka nongujor ka la sngewthuh ba ka la ngat ha ka jingriam.
