Shillong, Nailur 23: U Myntri ka sorkar jylla bad u state working president ka NPP u Marcuise N Marak u la pynpaw ka jingai khublei ïa u Myntri Rangbah u Conrad K Sangma ba u la pynneh ïa u kum u Myntri ha kaba kane ka pyni ka jingshaniah bad ka jingngeit ha u.
U Marak u la ong ba u la trei khlem shong thait ha kine ki 2 snem shiteng ban shakri ïa ki nongshong shnong ka Meghalaya bad un ïaibteng ban leh ïa kaba bha tam ban kynjoh ïa ki jingïohi jngai jong u Myntri Rangbah.
“Nga pynpaw ka jingai burom ïa u Myntri Rangbah ba u la pynneh ïa nga bad nga kwah ban pynthikna ba ngan leh ïa kaba bha tam ban shakri ïa ki paidbah bad ban trei na ka bynta ka jylla bad ban trei na ka bynta ki thong jong u Myntri Rangbah ba la buh na ka bynta ka jylla Meghalaya,” u la ïathuh sha ki lad pathai khubor ha ka sngi baar.
“Ngi la trei na ka bynta ka NPP naduh ba sdang. Lyngba ki jingeh kiba bun jong ka party, ngi don bad ka ka party. Namar kata ngi la tei ïa kane ka party. Namar kata nga kwah ban ong ba u la ai ha nga ka lad, u la ai ka jingngeit bad ka jingkitkhlieh kaba ngi la leh na ka bynta ki paidbah kum ki nongïalam ka party bad ka thong u Myntri Rangbah ïa ki jingangnud u late PA Sangma. Namar kata nga long uba kmen bha ba ïoh kane ka lad ban trei kum ka kynhun bad u Myntri Rangbah bad nga kyrmen ba da ka jingkyrkhu U Blei bad jong baroh ngin lah ban kynjoh ïa ka thong,” bynrap u Marak.
U la kren ruh shaphang u nongseng u (L) PA Sangma, kum u tyllong ka jingai mynsiem bad lam lynti bad banjur ïa ka jingdonkam ka jingpynneh ha ka saiñ hima sima.
U Marak u la ïathuh khana ruh shaphang ka jingïaid lynti jong u bad ka NPP, naduh ba u la pynïasoh bad ka party ha u snem 1999 shaduh ban poi sha ka kam ïakhun elekshon bad ban shakri kum u Myntri ka sorkar.
U la ai ka jingïaroh ïa u PA Sangma ïa ka jinglong nongïalam bad ka jinghikai ïa u ha ka kam saiñ hima sima.
“Nga ïasoh bad ka party bad nga ïakhun na ka Nationalist Congress Party (NCP). Ha ka election 2003, nga shah rem tang da 61 vote. Nga bteng ban ïai trei bad nga ïakhun biang ha u 2008 na ka NCP ticket bad nga jop da kaba tam kput 5000 tam pyrshah ïa ka Deborah Marak,” ïathuh u Myntri da kaba kynmaw ba ki la thaw ïa ka sorkar kaba neh tang 10 bnai ha u snem 2008.
U Marak u la kynnoh ruh ïa ka jingeh na ki kam lehnoh ha Garo Hills kaba la pynrem ïa ka NPP ha u 2013.
“Hynrei ha katei ka por ka la long kaba ngi hap ban ïakhun na ka daw ki kam kaikhlaw kiba la kiew bha. Kumta ha u 2012 na ka daw ka jinglong jingman, ngi la pynkynriah bad thaw da ka party ba thymmai ba khot ka National People’s Party (NPP). Ngi la ïakhun na ka tiket NPP ha u 2013 hynrei sniew bok baroh ngi la rem bad tang u James PK Sangma bad Nihim D Shira kiba neh kum ki MLA. Lada ym dei na ki kam kaikhlaw ngi la dei ban neh kum ki MLA bad jop ruh bun ki seat hynrei nga ïaineh bad ka party watla bun ki la iehnoh,” u la ong.
U la ïathuh ba u la pynngeit ïa katto katne ki nongïalam kiba la ieh ïa ka party ba kan ym long kaba bha ban kynriah na kawei ka seng sha kawei pat.
U la ïathuh ba u la ïoh jinghikai shibun na u late PA Sangma, da kaba ong, “Ka Garo Hills ka la dei ban pluh lada u PA Sangma um pdiang ïa ka rai jong u paidbah ha u snem 2013.”
“Naduh kane nga bteng ban trei bad u bad ha u 2018 ka la long ka jingkyrkhu. Watla u PA Sangma um don shuh bad ngi ki jingïalam lynti, ki jingïohi jngai, ki jinghikai ba ngan don ka jingkitkhlieh,” u la ong da kaba kdew, “Mynta haba ngi don ki jingeh kum ha GHADC bad kiwei, ngi kren ïa ki, ngim leh da ka bor, ngi ngeit ha ka jingïakren. Kumta nga ieid ban trei bad ka NPP,” u la bynrap.
U Marak u la pynkut da kaba pynpaw ka jingkyrmen ba ki paidbah kin ai khambun ka jingkitkhlieh ïa ka NPP ha ki por ban wan, ban pynlah ïa ka party ban trei na ka bynta ka bha ka miat jong ka jylla.
