Shillong, Nailur 23: Ka pisa kaba sah ban siew kaba la kot T. 700 klur ka dang sah na ka bynta ki projek ka Jal Jeevan Mission (JJM) ha Meghalaya.
Haba ïathuh ïa kane ka sngi baar, u Myntri ka tnat Public Health Engineering (PHE) u Marcuise N Marak u la ong, “Ki por ba dei ban siew, kaba ngi dang hap ban siew ka la long jan T. 700 klur.”
Hynrei u la pynshai ba kane kam dei na ka jingleh jong ka sorkar, hynrei ka dei na ka daw ki rukom treikam ba slem ha ka kyrdan jong ka sorkar pdeng.
“Kam dei na ka daw ka sorkar jylla hynrei ka dei na ka daw ka sorkar pdeng naba ki don katto katne ki rukom treikam. Ka sorkar India ka donkam ban shim ka rai naba ïa ka thong la buh ba kan long ha ka 31 tarik u Lber, 2024 bad hadien kane ka sorkar India kam pat shim kano kano ka rai,” ong u Marak da kaba pynbna ba ka sorkar India ka la pynjlan ïa ka por ban pyntreikam ïa ka JJM haduh u snem 2028.
U Myntri u la pynthikna ba ka pisa kaba la buh yn pyllait sha ka jylla hadien ba la pyndep ïa ka audit ka ban pynlah ban siew ïa ka pisa sha ki contractor.
“Kumta, ka sorkar India ka dei ban pyllait ïa ka pisa kaba la dep ban mang sha ka Jal Shakti Ministry bad katkum ka jingdonkam ba la bthah da ka finance ministry, ïa kane ka audit la leh da ka Jal Shakti Ministry bad shisien ba la pyndep, yn sa pyllait ïa ka pisa sha ka jylla bad shisien ba la pyllait ïa ka pisa yn sa sdang ban siew ka pisa sha ki contractor,” u la ong.
U Marak u la ong ba ka jingslem ban siew ïa ka pisa ka la ktah ïa ka kam jong katto katne ki projek, haba ki contractor kiba lah ban trei ki la bteng ïa ka kam katba kiwei pat ki la sangeh ïa ka kam na ka daw ka jingduna ka pisa.
U la pynpaw ka jingsngewthuh ïa ki jingeh ba mad da ki contractor bad pynthikna ba ki la don ki jingpyrshang ban pynbeit ïa kane ka kam.
