Shillong, Nailur, 23: Ka Iingbishar Meghalaya High Court ka la bthah ban pynneh ïa ka status quo ha ka jingthungkam na ka bynta ka post Animal Husbandry and Veterinary Officer hadien ba ka la don ka jingujor kaba kynnoh ba ka Meghalaya Public Service Commission (MPSC) ka la leh shiliang khmat.
Ka Bench kaba la khlieh da u Acting Chief Justice u Bah HS Thangkhiew ha ka hukum ba la pynmih ha ka Lah Sngi u Blei ka la bthah ba ïa ka jingujor yn buh sngi biang ban shong bishar ha ka 25 tarik, Nailur haba pdiang ïa ka jingkyrpad ba shipor da ki nongmudui.
“Tad haduh ka tarik ba la buh, dei ban pynneh beit ïa ka status quo,” ka la ong.
Kane ka la wan hadien ba ka Bench ka la pan jubab na ki nongshah mudui, da kaba aipor ïa ki ar sngi ban ïoh ïa ki jingbthah ba donkam.
Ki nongmudui ki la kynnoh ba ka rai jong ka MPSC ban pynlong ïa ki ‘direct interview’ na ka bynta katei ka kam ka long pyrshah ïa ka Meghalaya Animal Husbandry and Veterinary Service Rules, 2000.
Ki nongmudui ki la kam ba ka Rule 7(5) jong ka Meghalaya Animal Husbandry and Veterinary Service Rules, 2000, ka bthah ban thungkam beit beit sha kano kano ka kam ha ka kyrdan II (Junior) lyngba ka eksamin ne interview ba la pynlong da ka Commission. Ka rukom jong ka MPSC la kynnoh ba ka pynkhein ïa kane ka kyndon.
Ki nongmudui ki la kynnoh ba ka MPSC ka la leh shiliangkhmat da kaba pynaw ba watla ki long kiba tbit bha, hynrei ka kyrteng jong ki kam shym la paw satia ha ka thup kyrteng ba la shah jied.
