Shillong, Nailur, 23: Lai sngi hadien ba ka heprit Iwanpynkmen Nongsiej, 14 snem ka rta na ka dong Mawlangkhar jong ka shoong Ksehkohlong, West Khasi Hills Distrirct ka la jah na la ïing ha ka sngi baar ha ka por kumba 12 baje mynsngi la lap noh ïa ka met ïap jong ka kaba la sdien phasi ha u dieng.
Katkum ka jingïathuh u Sordar ka shnong Ksehkohlong u Bah Ïoannis Lyngdoh la ong ba ka heprit ka la jah na la ïing naduh ka sngi Saitjaiñ jong ka taïew ba ladep bad ïa ka met jong ka heprit la lap da ki briew na kawei ka lawbniap hajan ka shnong katba ki dang leit kheit tit.
La ïathuh ba ïa ka metïap jong ka heprit la lap ba ka la sdien ha uwei u dieng kseh.
Ki Pulit kiba la leit ban shimti noh ïa ka metïap ban pynkit sha Civil Hospital Nongstoiñ ban leh ïa ka postmortem shwa ban aiti noh sha ki bahaing hasem ban pyndep ïa ka jinglehniam ba khatduh.
