Nongstoiñ, Nailur, 24: Ki bahaïing ha sem jong ka heprit ba la 14 snem ka rta kaba la tip kyrteng kum ka Iwanpynkmen Nongsiej na ka shnong Ksehkohlong Nongstoiñ, West Khasi Hills District, ki la pyntikna ba ka jingïap jong ka kam shym dei satia ka jingshah leh dusmon hano re hano hynrei ka dei ba ka la leh hi bad dkhat jubor ïa la ka jingim.
Kum ban shu pynkynmaw ba ïa ka met ïap jong katei ka heprit la lap ba ka la sdien phasi ha u dieng ha ka shiteng sngi jong ka 23 tarik mynta u bnai ha ka por kumba 12 baje eiei mynsngi da ki briew kiba leit kheit tit na kawei ka khlaw kaba la tip kum ka Tangtadew kaba hap hapoh ka shnong Ksehkohlong kaba don kham pajih na ka ïing sah kata hadien lai sngi ba ka heprit ka la jah rngai khlem wan phai shuh sha ïing.
Na ka liang jong ki bahaïing hasem jong ka heprit ha ka sngi Balang ki la shimti noh ïa ka met ba sah jong ka heprit na Civil Hospital Nongstoiñ ban pynkit sha Ksehkohlong ban pyndep ïa ka jinglehniam bakhatduh.
U Kñi jong ka heprit, u Bah Sholestar Nongsiej u la ïathuh ba ka la mih na la iing naduh ka 20 tarik mynta u bnai ban leit peitkai ïa ki nongïathong khwai dohkha hapoh ka pung Pamphyrnai, hynrei naduh katei hi ka janmiet kam shym wanphai ïing shuh.
Shuh shuh u la ong ruh ba kam don kano kano ka jingsuba sniew halor ka jingkhlad jong ka hynrei ki la pyntikna ba ka dei ka jingleh hi da kaba sdien phasi ïalade ha uwei u diengkseh kaba jngai tang kumba 400 metre eiei naka ïing sah.
U la kam ruh ba ka dei ka khynnah kaba tamsneng bad la arsien ka la jah na la ïing bad haba ka kmie ka mai ka sneng, ka phet noh na la ïing ban leit sah sha lum sha wah.
U la ïathuh ba kum ki bahaiing, kim lah satia ban mutdur ba kan leh haduh katne ïalade bad ki dang pyrkhat ba ka leit sah kai bad la ki paralok namar shwa ban mih na iing ka ladep sum dep sleh bad song ruh ïa ki jaiñ ki nep.
