Shillong, Nailur, 25: Ki Pulit kiba la ïoh pdiang ïa kawei ka ejahar ha ka 25 tarik, Nailar, 2025 ba la kam ba kawei ka khynnah skul ka la shah lute ha ki runar ha Lumïablot, Nongthymmai katba ka dang wan phai na skul hynrei ha ka jingtohkit ki la lap pynban ba ka dei tang ka jingujor lamler.
U Superintendent of Police, East Khasi Hills Bah Vivek Syiem ha u kyrwoh ba la phah sha ki lad pathai khubor ha ka sngi Palei u la pyntip ba ki Pulit ka Nongthymmai Beat House ki la ïoh pdiang ïa ka ejahar ba la kynnoh ba ki don saw ngut ki runar ki bym lah satia ban ithuh durkhmat ki la khang kdong ïa kawei ka khynnah rit katba ka dang wan phai na skul bad lute ïa ka pisa T. 300 ha kaba uwei na kine ki runar u la pynap tari bad byrngem byrsit ruh ïa ka.
Katkum ka ejahar la kam ba ka khynnah skul ka la shah lute ha Lumïablot, Nongthymmai kat haduh ba ka la khynniuh baroh shirynieng.
Ïa ka ejahar ba ki Pulit ka Nongthymmai Beat House ki la ïoh pdiang ki la register case ha kajuh ka sngi ha Rynjah Police Station hapoh ka Section 309(4)/309(6)/351(3)/126(2)/3(5)/3(6) BNS bad pynlong ruh ïa ka jingtohkit kaba bniah ban lapdien ïa ki runar kiba donkti.
“Ka jingjia ka la pynkhuslai bad pynsyier mynsiem ïa ki paidbah,” la ong u SP.
“Hadien ba la pynlong ïa ka jingtohkit kaba bniah bad shim ruh ïa ka jingkren jong ka khynnah hakhmat u Magistrate ha District Court, ka khynnah ka la phla ba ka la ai pisa ha ka paralok jong ka ban thied ïa ka tiar ba la shu order online. Namar ka jingsheptieng ba la pynlut ïa ka pisa baroh, ka la thaw khana da kaba kam ba ka la shah lute,” la pyntip u SP.
“Namarkata, kane ka jingjia kam shym la jia kumba la kynnoh bad ka jingjia kumba la pyntip kam dei hi ruh kaba shisha. Ha kaba ïadei bad kane, ïa ka kaiphod kaba khatduh yn sa aiti,” u la bynrap.
“Lah ruh ban kdew ba ka jingai jingtip lamler (ejahar) sha ki Pulit ka dei ka kam runar bad yn shah pynshitom katkum ka aiñ,” la maham u SP.
Kane ka dei ka sien kaba ar kaba ki Pulit kin lap ha ka jingtohkit ba ka jingujor ka dei kaba shu lamler.
Ka jingjia ka banyngkong ka dei ka jingkam jong kawei ka khynnah ba ka la shah dung da u thyrnia injekshon hajan madan Student’ Jaiaw. Ha ka jingtohkit ki Pulit ki la lap ba ka dei tang ka jingthok suda bad ka dei tang ka nia shu thaw.
