Shillong, Nailur, 26: Ka kali jong u Acting Syiem ka Hima Nobosohphoh u Pa’iem Ferdinand Syiemiong ka la iingkhong bad julor hadien ki runar ki bym lah ban tip ki la wiang ding ïa ka kali ha ka miet 25 tarik Nailur 2025 ba la pynieng harud surok ha ka shnong Rangblang, South West Khasi Hills District.
Ha ka jingïakren bad ki lad pathai khubor, u Acting Syiem u la ïathuh ba kane kam dei satia ka sien kaba nyngkong ba ka kali jong u kan shah leh dusmon ha ki briew namarba ha ka jingjia kaba nyngkong ki runar ki la pynpait ïa ki iit jong ka kali bad ha kane ka kynti ki la wiang syndon da ka ding.
U Acting Syiem u la pynpaw ruh ïa ka jingsngewsih halor kane ka jingjia bad u la kyntu ïa ki briew kiba donkti ban mih shakhmat ban ïakren da kaba shai na kaei ka daw ba ki la leh ïa kane ka kam dusmon.
