Shillong, Nailur 26: Ka Shillong Traffic Police ka la pynbna ïa ki kyndon pynïaid kali ba kyrpang na ka bynta ka jingleit jingwan jong ki kali bad ki lad jingïada ïa ki paidbah ha ki sngi rakhe ïa ka Durga Puja ha nongbah Shillong ka ban sdang naduh ka 28 tarik mynta u bnai haduh ka 2 tarik u Risaw, 2025.
Ïa ki Heavy Motor Vehicles (HMVs) yn pyrkhing ban rung sha nongbah Shillong naduh ka 29 tarik mynta u bnai haduh ka 2 tarik u risaw, 2025, hapdeng ka por 7:00 baje mynstep bad 11:00 baje mynmiet manla ka sngi, bad kane ka shong ruh halor ki jinglong jingman ka jingïaid ki kali.
Halor ki katto katne ki lynti kiba donkam pynkylla, ki pulit ki la ïathuh ba katto katne ki surok kiba ïalam sha ki Puja pandal kiba heh yn pynbna No Entry Zone na ka bynta ki kali shimet hynrei yn pynbiang pat da kiwei ki lynti.
La bthah ïa kiba wan jngoh ba kin pynïeng ïa ki kali sha ki jaka pynïeng ba la buh kyrpang. Ka khang ïa ki kali ban pynïeng ha ki rud surok bad kiba pynkheiñ kin shah daiñ kuna.
Na ka liang ki pulit pynïaid kali kin khmih sha manla ki jaka ban peit ruh ïoh don kiba ñiah kali khlem akor bad kiba ñiah khlem suitñiew, ka jingñiah sted ïa ki kali bad kumjuh ruh ba ñiah kali ynda la dih kiad.
La pynshlur ruh ïa kiba leit sha ki puja pandal ba kin shu ïaid noh da ki kjat khnang ban lah kiar na ka jingdheng kali bad ban bud ïa ki jingbthah ki bor pynïaid District bad ka tnat pulit. Lada don ki emergency ne jingdonkam ba kyrkieh, ki briew ki lah ban dial ha u nombar 112.
Na ka bynta ki lad jingïarap, ki nongshong shnong bad kiba leit sha ki puja pandal ki lah ban contact ïa ki traffic control number: Laban Traffic Branch – 69093-96411, Laitumkhrah Traffic Branch – 69093-96412, Rynjah Traffic Branch – 69093-96413, Lumdiengiri Traffic Branch – 69093-96414, Sadar Traffic Branch – 69093-96415, Madanrting Traffic Branch – 69093-96416 bad Mawlai Traffic Branch – 69093-96417.
Ka Shillong Traffic Police ka kyrpad ïa ka jingïatreilang jong baroh khnang ban pynlong ïa ka leit ka wan kaba lah ban pynïaid ha kine ki por ba don ka jinglehniam Puja.
