Shillong, Nailur, 26: Ka Ïingbishar Meghalaya High Court ka la phah ïa ka Public Interest Litigation (PIL) ba la ïadei bad ki ksew surok sha ka Ïingbishar Supreme Court, hadien ba la ïoh jingbthah na ka Ïingbishar ba hakhliehduh jong ka ri.
Ka Case, PIL No. 4 of 2024, kaba dang sahteng hapoh ka Ïingbishar High Court, ka la shimti hi halade ïa ka kam namarba ka kham long kyrpang.
Ka ïingbishar Supreme Court, ha ka hukum ba la pynmih ha ka 22 tarik, Nailar 2025, ka la bthah ba baroh ki Writ Petition na ki ïingbishar High Court halor ka mat jong ki ksew surok dei ban phah lut sha ka ïingbishar Supreme Court ban bishar bniah kumjuh.
Ka Division Bench kaba kynthup ïa u Acting Chief Justice HS Thangkhiew bad u Justice W. Diengdoh mynta ka la pynphai biang ïa ka hukum kaba kham mynshwa (kaba la pynmih ha ka 30 tarik, Nailur, 2025) bad bthah ïa ka tnad Registry ban pynpoi kloi ïa ki rekod jong ka PIL sha ka Supreme Court.
Kane ka rai jong ka ïingbishar ban pynkynriah noh ïa kane ka mukotduma ka long hadien ba la sngap ïa ki jingai jingmut na u Advocate General bad u nongïasaid aiñ ba rangbah u Kaustav Paul, kiba la wan mih hi dalade.
Baroh arliang mamla ki la mynjur ba dei ban pynkynriah noh ïa ka mukotduma sha ka Ïingbishar Supreme Court katkum ka jingbthah jong ka.
“Ha ka jingïohi ïa ki jingai jingmut ba la pynpaw bad ki jingbthah jong ka hukum ba la pynmih ha ka 22.08.2025 da ka Ïingkashari Supreme Court ha ka Suo Moto Writ Petition (Civil) No(s).5 jong u snem 2025 – Ha kaba ïadei bad: “City Hounded by Strays, Kids Pay Price”, ka hukum jong kane ka ïingbishar kaba 30.8.025 ka la pynphai biang ïa ka PIL bad ïa ka rekod jong ka PIL ba mynta (PIL No. 4 jong u snem 2024 ) dei ban pynpoi da ka Registry jong kane ka Ïingbishar sha ka Registry jong ka Ïingbishar Supreme Court kham kloi katba lah.”
Halor kitei ki jingkdew haneng, la shah bad pynwai noh ïa ka MC (PIL) No.6 jong u snem 2025,” la ong ka ïingbishar ha ka rai ba la pynmih ha ka sngi Thohdieng (26 tarik, Nailur).
