Shillong, Nailur, 26: Ka Achik National Volunteers Council (ANVC) bad ka kynhun ba ïapait ANVC-B ki ar tylli ki seng kieng atiar ba la shah pynduh pyndam ki la rai ban leit jurip ïa kiba bun ki projek ba la pyntreikam da ka Sorkar Jylla kum shi bynta ka jingpyntreikam ïa ka Agreed Text for Settlement ba la ïasoi ha u snem 2014.
“Ki nongsoi kin sa leit jngoh ïa ki projek kiba dang ïaid shakhmat bad kiba ladep bad treikam,” la ong u Chairman ka ANVC-B uba dei ruh u MDC ka BJP na Tura u Bernard N Marak ha u kyrwoh ba la phah hadien ka jingïashim bynta ha ka jingïalang ba la khot da u Symbud Myntri Rangbah ka jylla uba khmih ïa ka tnat Kam Pohing u Bah Prestone Tynsong ha ka sngi Thohdieng.
“Bun na ki projek la shimkhia da ki tnat treikam ka Sorkar ïa kiba yn hap ban leit jurip ban sakhi da la ki khmat da ki nongïasoi ïa ka soskular,” u la bynrap.
U Marak u la pynpaw ruh ïa ka jingsngewkmen na ka jingmih jong ka jingïakren ha ka jingïalang kaba la neh lai kynta, bad kaba la pynlong hadien hynriew ne hynriew snem eiei.
U la pyntip ba ha kane ka jingïalang la ïakren ïa ka jingïaid shakhmat halor ki jingthmu bapher bapher kiba la kdew ha ka Agreed Text Settlement, kynthup ïa ka jingseng ïa ka Medical College, ka Captain Williamson Sangma State University, ka jingthaw ïa ki district bad ki block kiba thymmai, bad ka jingpynbha ïa ki jingtei kiba la don lypa.
U Marak u la ong ba ka Sorkar ka la pynthikna ba yn pynsted ïa ka jingïarap pisa na ka bynta ka Garo Hills Autonomous District Council (GHADC), da kaba bud ryntih ïa ka Agreed Text Settelement.
La pynlong ïa ki jingïakren ban kyntiew ïa ki Civil Hospital kiba la don lypa, ki ITI, ki Polytechnic, ki Engineering College, bad ki Horticulture College, bad kumjuh ruh ban pyndap ïa ki kam kiba lait ha ki kolej Sorkar.
Ha ka jingïalang la ïakren ruh halor ka jingpyndonkam ïa ka pisa ba ïadei bad ki kam khlaw bad ka pisa jong ki Rural Local Bodies bad Urban Local Bodies.
“Ïa ka jingdon jong ki Village Council la pynshai da u Deputy CEM ka GHADC bad kiwei kiba la kubur da u Symbud Myntri Rangbah bad kiwei kiwei kiba don lang ha ka jingïalang,” u la ong.
Ka Sorkar Jylla ka la pynthikna ba ki kam ha kad liengsuiñ kin sdang biang, bad ki projek surok kin kham sted, ong u Marak da kaba bynrap ba ka Sorkar kan buddien ïa ka 125th Constitution Amendment Bill, kaba long kaba kongsan bha na ka bynta ban pyntreikam ïa ka Agreed Text.
La thung ïa ki Nodal Officer ha ka kyrdan District ban pynsuk ïa ka jingïatreilang hapdeng ka jylla bad ka District, u la bynrap.
