Shillong Nailur 30: U MDC ka Nongthymmai Constituency u Bah Winston Tony Lyngdoh ha ka sngi Baar ula shimti kum u CEM ba thymmai jong ka KHADC.
Ha ka dorbar, ki MDC ka KHADC ki la khublei ïa u CEM ba thymmai ka KHADC uba dang shimti nyngkong eh ïa ka shuki CEM hadien ka jinghiar shuki kynsan jong u CEM barim ka KHADC u Bah Shemborlang Rynjah na ka daw ka jingpang kaba ban ha ka met jong u hadien ba u la shakri la kumba 6 bnai eiei.
U Nongïalam ka Liang Ïatei u Bah TW Chyne uba la ong ba ki MDC ka Liang Ïatei kin ai ka jingkyrshan, kin ai jingmut ïa ka EC ba thymmai hapoh ka jingïalam u CEM ba thymmai.
Nangta u MDC ka Mawthadraishan Constituency u Bah Powell Sohkhlet uba la pynpaw ba u Bah Tony uba la bat kum u EM 6 bnai ula ïohi ba u la don ka jingtbit bad kyrmen ba un lah pynïaid shakhmat ïa ki kam, watla sngewsih ba hap iehnoh kam kyndit u CEM barim na ka daw ba um don ha ka met bad Koit ba Khiah.
U la ïathuh ba haba ki MDC kiba la don marjan bad u Bah Shemborlang Rynjah la ïohi shisha ba u la shitom bha hynrei namarba u dei uba satar u la trei shitom beit ïa ka kam. “Nga ka kyrpad ïa ki paidbah ba kim dei ban don ka jingsngew lyngngoh ïa ka jinghiar shuki jong u CEM barim hynrei ban duwai ban un ïoh noh ka met bad Koit ba Khiah bad nga pynpaw ruh ba ka jingkhang jong ki EM ka long barabor na ka bynta baroh ki MDC,” u la ong.
Katba u MDC ka Laban Mawprem constituency u Bah Ricky Shullai u la kitbok kitrwiang ïa u Bah Shemborlang Rynjah namar u la dei u nongïalam ba don jingkitkhlieh bad u la kitbok kitrwiang ruh ïa u Bah Winston bad kyrmen ba un shimkhia ïa ki kam khamtam ba mynta ka Sorkar ka la sdang knieh noh ïa ki constitutional rights ka council.
U MDC ka Mawthengkut u Bah Srally Rashir u la ai khublei ïa u CEM ba thymmai bad kyrpad ba un peitbniah ïa ki jaka puta ba la shah knieh ha kiwei ha ki thaiñ khappud.
