Shillong, Nailur 30: U Chief Executive Member ba thymmai ka KHADC u Bah Winston Tony Lyngdoh u la ong ba ka Voice of the People’s Party (VPP) bad ka Council ki la rai ban kyntait ïa ka jingtyrwa jong ka Sorkar Jylla ban siew ïa ka tulop jong ki nongtrei ka Khasi Hills Autonomous District Council.
Haba kren sha ki lad pathai khubor ha ka sngi Baar u Bah Lyngdoh u la ong, hadien ka jingïalang bad ka Sub Committee ba la thaw da ka Sorkar, ka Council kan sa ai ïa ka rai kaba khatduh halor kane ka kam, bad ka pynskhem ruh ïa la ka jingïeng skhem kaba shai ba ka pyrshah ïa kane ka jingtyrwa jong ka sorkar.
“Ka Executive Committee bad ka VPP ka la phah ïa ka khubor kaba shai ba ka kyntait ïa kane ka jingtyrwa. Watla ngi la dep ban ïakynduh hapoh ka sub committee ka sorkar bad ba ngin sa ïakynduh biang shen ban pynpaw ïa ka rai kaba khatduh halor ka nongrim jong ngi, hynrei ngi ïaineh skhem ha la ka jong ka rai: ngin ym pdiang ïa ka jingtyrwa jong ka sorkar la ka long ha kano kano ka rukom,” u la ong.
U Bah Lyngdoh ha kawei ka liang u la kyntu ïa ka sorkar jylla ba kan pynlait noh ïa ka bhah jong ka council khnang ban lah pyntyllun ïa ki kam nalor ka jingai ïa ka jingïarap pisa kaba shisien ai ne ka one-time grant-in-aid ban pynkhlaiñ ïa ka pla tyngka jong ka council.
“Nga kyntu ïa ka sorkar jylla ba kan pynlait ïa ki bhah ha ka por kaba dei ban pynthikna ïa ki rukom treikam jong ka Council. Ngi dang pyrkhat ban ïakynduh ïa ka tnat DCA ban wad ki lad ki lynti ban pynkhlaiñ ïa ka jinglum khajna jong ka council,” u la ong da kaba bynrap, “Lada ka sorkar ka kwah shisha ban kyrshan ïa ka district council, nga kyrpad ba kidei ban pynlait ïa ki bhah kiba dei hok jong ka Council ha ka por kaba biang. Watla ka pla tyngka jong ka KHADC ka dang long kaba dang biang ne kaba skhem, ngi kyrmen ba ka sorkar jylla kaba la pynpaw ïa ki jingsngewkhia na ka bynta ka council bad ïa baroh ki ADC da kaba pynlait noh ïa ki bhah kiba dangsah bad ban ai ki lad na ka bynta ban ïoh lum ïa ki khajna. Shuh shuh lada ka sorkar ka long kaba sngewkhia bha shaphang ka jingdonkam ban kyrshan ïa ngi, ngi tyrwa ba ki dei ban pyrkhat ban ai noh da ka one-time grant-in-aid khnang ban pynkhlaiñ ïa ka pla tyngka jong ka council.”
Halor bad ka jingïadei hapdeng ka sorkar jylla bad ka KHADC ba la ïalam da ka VPP, u CEM ka KHADC u la ong ba kumba ka long mynta ka long pdeng, kam da long kaba bha ne kaba sniew ruh.
“Baroh ar kynhun ngi pyrshang ban ïatreilang halor ki rai kiba kongsan, kaba pyni ïa ka jingdon ka mon ban ïatreilang. Ha kawei ka liang ka council ka la kyrpad ïa ka jingdonkam ban pynlait ïa ki bhah marpoh khyndew ha ka por kaba biang ban pynthikna ba kan ym don kano kano ka jingpynthut. Ka don katto katne ka pisa kaba dei ka bhah kaba dang sah kaba khlem pat pynlait, bad ka council ka dang ap ïa ka jubab na ka sorkar jylla hadien ba la aiti ïa ki jingai jingmut sha ka sub-committee,” u la bynrap.
Haba kylli, u Bah Lyngdoh u la ong ba la palat 6 bnai, ka Executive Committee ba la ïalam da ka VPP ka la lah ban pynduna ïa ki jinglut ki bym da long kiba kongsan.
Halor u uranium u Bah Lyngdoh u la ong ba ka Council kan ïai pyrshah beit bad kan sa don ruh ka jingïasyllok ïa kane ka kam shisien ba la treikam pura bha ka Executive Committee ba thymmai,” u la pynthikna.
