Shillong, Nailur, 30: U Myntri Rangbah ka jylla u Conrad K Sangma u la pynthikna ban bishar shwa ïa ka jingdawa jong ki nonghikai skul Adhoc hapoh ka shatri jong ka Federation of Adhoc School Teachers of Meghalaya (FASTOM) kiba dang pynlong ïa ka jingïakhih shong kyllaiñ myngor ba khlem pud sngi la palat khyndai sngi da kaba dawa ïa ka Sorkar ban kyntiew kyrdan ïa ki skul Adhoc sha ka Deficit System.
Haba kren sha ki lad pathai khubor ha ka sngi Baar, u Sangma u la pynshai ba ka mat jong ki nonghikai Adhoc ka ïapher na kiwei pat ki kynhun, namarba ki ïoh ïa ka tulop jong ki ha ka por kaba biang, watla ka don ka jingpynslem teng teng. Ka jingdawa kaba kongsan jong ki nonghikai Adhoc ka long ban pynkiew ïa ka tulop jong ki.
Ka Sorkar ka dang bishar bniah ïa kane ka jingdawa da kaba pyrkhat ruh ïoh ba ka ktah ïa kiwei pat ki kynhun nonghikai, kum ki nonghikai SSA bad ki nonghikai jong ki skul Adhoc.
U Myntri Rangbah u la banjur ba ka jingmynjur ïa ki jingdawa jong kawei ka kynhun ka lah ban don ka jingktah ïa kiwei pat ki kynhun. Kumta ka Sorkar ka donkam ban bishar bniah na baroh ki liang shwa ban shim ïa ka rai.
“Ka sorkar ka dang bishar bniah ïa kine ki bynta baroh namar kine ki ïadei lang baroh. Shisien ba ngi la mynjur ban pynkiew tulop ïa kawei ka kynhun nonghikai, kumban shu ong ïa ka SSA, ngi don pat sa ki nonghikai skul Adhoc bad kiwei kiwei ki kynhun kiba don hangta. Kumta, ngi donkam ban peit ïa baroh ki bynta bad nangta ngi shim ïa ka rai. Namarkata, kane ka long kaba eh ïoh ka ktah kham heh ha baroh kawei ka bynta bad ngi hap ban da bishar bniah.”
U Sangma u la pynthikna ba ka sorkar ka tip ïa ki jingeh jong baroh ki kynhun hynrei ka dei ban pynïabiang ïa kine ki jingdawa bad ki jingeh kiba ka ïakynduh.
“Ha,oid, baroh ki don ki jingsngewkhia bad ïa ki jingdawa jong ki ruh ki long kiba shongnia bad ngam kyntait ïa kata hynrei ngi hap ruh ban ïohi ïa ki jingduna kiba ngi don bad peit kumno ngin rah ïa kiei kiei shakhmat,” u la ong bad pynpaw shai ba ka jubab jong ka sorkar ïa ka jingdawa jong ki nonghikai Adhoc kam dei ban pyllait ïano ïano hynrei ka dei shaphang ka jingpynbeit ïa ki jingeh jong ki.
