Shillong, Nailur, 30: U Myntri Rangbah ka Jylla Conrad K Sangma ha ka sngi Baar u la ai khublei ïa u Chief Secretary ka Jylla Bah DP Wahlang uba la shongthait noh na ka kam hadien ba u la shakri la 32 snem na ka bynta ka jylla Meghalaya.
Ha ka jingïalang jong ka Kynhun Myntri kaba la long mynta ka sngi, u Sangma u la pynpaw ïa ka jingïaroh bad ïa ka jingsngewnguh ïa u Bah Wahlang namar ki jingshakri kiba u la ai ha ka kam kum u shakri Sorkar.
U Sangma u la ïaroh ïa ki jingnoh synniang jong u Bah Wahlang sha ka jylla, da kaba kubur ïa ka jingtrei shitom bad ka jingaiti lut jong u ha ka kam shakri.
Ha ka kyrteng jong ka Kynhun Myntri, ka Sorkar, ki nongtrei bad ki paidbah ka jylla Meghalaya, u Myntri Rangbah ka jylla u la pynpaw ïa ka jingsngewnguh kaba khraw ïa u Bah Wahlang halor ka jinglen lade ban ai jingshakri ba khlem shongthait ïa ka jylla.
“U Bah Wahlang un shongthait noh mynta ka sngi bad u la ai 32 snem ka jingshakri ïa ka jylla bad ïa ki paidbah bad mynta ka sngi ka dei ka jingïalang ka Kynhun Myntri kaba khatduh jong u bad nga kwah ban buh ha ka rekod ïa ka jingïaroh bad ka jingsngewnguh na ka bynta ki jingshakri kiba u la ai ïa ka jylla Meghalaya”, la ong u Sangma.
