Shillong, Nailur, 30: Ka Kynhun Myntri jong ka Sorkar Jylla ha ka sngi Baar ka la mynjur ïa ka Standard Operating Procedure (SOP) ban pynïaid ïa ka Taraghar State Guest House bad ïa ka Meghalaya Directorate and District Drivers’ Service Rules, 2025.
Ha ka jingïakren bad ki lad pathai khubor hadien ba la wai ka jingïalang, u Myntri Rangbah ka jylla u Conrad K Sangma u la ïathuh ba ïa ka State Guest House ha Tara Ghar la plie paidbah dang shen.
“Kumta, ngi la pynkhreh ïa ka ka Standard Operating Procedure (SOP) kumno yn pynïaid ïa ka State Guest House ha Tara Ghar, kumno yn ai kamra, ïano yn ai bad ki bynta ba pura kumno ban pynïaid ïa ka ïing sah. Ïa kane ka SOP la wanrah hakhmat ka kynhun myntri bad la mynjur ïa ka,” u la bynrap.
Halor ka Service Rules jong ki nongñiah kali, u Sangma u la ong ba ha ki snem ba ladep, ka tnat Personel ka la durut ban pynthikna ban don ka Service Rule namarba kane ka ktah beit beit hadien ba la thungkam bad kiew kyrdan jong ki nongtrei bad namar kata ka long kaba donkam ban don ïa ka Service Rule kaba thikna. “Namarkata, mynta ka sngi ngi la mynjur ruh ïa ka Meghalaya Directorate bad ïa ki District Driver’ Service Rules, 2025.”
Ka Kynhun Myntri ka la mynjur ruh ïa ka thup shuti jong u snem 2026. Katkum ka jingong jong u Myntri Rangbah kan long hi kumjuh kumba long ka thup shuti jong u snem 2025.
