Shillong, Risaw, 01: Ki nongïalam jong ka Federation of Khasi Jaiñtia and Garo People (FKJGP) bad ka Khasi Students Union (KSU) ha ka sngi Balang ki la leit ban ai jingkyrshan bad ai mynsiem ïa ki nonghikai skul Adhoc kiba pynlong ïa ka jingïakhih hapoh ka lama jong ka Federation of All School Teaches of Meghalaya (FASTOM) ha madan Malki kaba la kynjoh mynta sha ka sngi kaba shiphew.
U Vice President ka FKJGP u samla Kitboklang Nongphlang ha ka jingïakren bad ki lad pathai khubor u la ong, ‘ngi dap da ka jingsngewkhia kaba khraw halor ka jingïakhih jong ki nonghikai namarba ngi sngewthuh ba ka pule ka puthi ka dei kawei na ki mat bakongsan tam ba ka Sorkar kan pynbna kumba ngi la angnud.”
“Hynrei kaba sngewsih ba manla ki seng saiñpyrthei ha ki manifesto ha ka por elekshon ki ju kren ba kin pynbha ïa kane ka bynta (pule puthi) hynrei haduh mynta ka ïai jia kumne shi kumne ha kaba ki nonghikai ki hap ban mih sha madan ban dawa ïa ka hok jong ki,” u la ong.
“Ngim kwah shuh ba kum kine ki jingjia kin dang ïai bteng na ka por sha ka por,” u la ong bad bynrap, “ngi kwah ba ka Sorkar kan shim da kano kano ka sienjam ka ban weng shi syndon ïa kita ki jingeh. Kam dei ban shu pynslem kai. Lada ka Sorkar ka don pisa ban pynlut ha ki tamasa bapher bapher balei kam don pisa ban siew ïa ka hok jong ki nonghikai.”
“Ngi sngewthuh ba kane ka bynta ka dei ka mat kaba khia ngi ieh ha ka jingstad jong ka sorkar kaba mih na ka jingïalang (ka u Myntri Rangbah ka Jylla Conrad K. Sangma u la khot ïakren ïa ki nongïalam ka FASTOM) bad kaei kaba ki nongïalam ka FASTOM ki don ban ai ha ngi khnang ba ngin lah ban ai jingkyrshan bad ngin sa peit da kiwei pat ki sienjam ba ngin ïasnohkti lang tad haduh ba ki nonghikai kin da ïoh ïa ka hok ka jong ki,” u la ong shuh shuh.
“Wat hapdeng ka shuti kaba kiwei ki kynhun riewngeit ki rakhe ïa ka puja, katba ki nonghikai ha ka jylla jong ngi ki dang saja,” la kynthoh shuh shuh u Vice President ka FKJGP.
Haba kynthoh tyngeh ïa ka Sorkar, u Vice President ka FKJGP u la ong, “ngi sngew ba kane ka dei ka kam kaba sngewkhia bad ngi phah ïa ka kyrwoh kaba shai sha ka Sorkar Meghalaya lyngba u Myntri Rangbah lada ka Sorkar ka don pisa ban thung ïa ki Consultant bapher bapher bad ban thung ïa ki Chairman bad ki Vice Chairman hynrei kan eh aiu ban siew ïa ka tulop jong ki nonghikai kiba long u budlum ban pynïar ïa ka jingnang jingstad kaba long ka shlem ka ban saiñdur ïa ka lawei jong ki khun samla.”
Haba kylli, u la ong, “kane ka dei hi ka jingkheiñ sting jong ka Sorkar namarba naduh ki snem 2019-2020, 2021-2022 ba kane ka kynhun ka la aiti ïa ka dorkhas hynrei ka Sorkar kam shym la leh eiei.
U President ka KSU u samla Lambokstarwell Marngar u la ïathuh ba ka FASTOM ka la phah sha ka seng ïa ki mat jingdawa bad kum ka seng ka la shem ba ki jingdawa kiba shongnia bad shong nongrim.
U la ong ruh ba ka long ka jinglehraiñ ïa ka sorkar haba ki nonghikai kiba dei ban ai jinghikai ha ki saw kynroh jong ki kamra klas hynrei ki hap ban mih sha surok ban pynpaw ïa ka jingdawa hakhmat ka Sorkar.
“Ngin don borabor ha syndah jong ki nonghikai bad ngin ïai long ki nongkyrshan baradbah ïa ka jingdawa jong ki nonghikai,” u la ong bad bynrap, “ ka jingmih madan jong ki nonghikai ka dei ka jingleh kuman bad ka jingbym shimkhia lehse na ka liang jong ka Sorkar.”
“Ka jingïalang hapdeng ki nongïalam ka FASTOM bad u Myntri Rangbah ka dang ïaid bad ngim tip kaei ka jingïakren hynrei ngi khmihlynti ba kum u khliehduh jong ka jylla baroh kawei un ai ka jubab kaba pynhun ïa ki nonghikai kiba la shong kyllaiñ myngngor mynta la katno sngi shuh,” u la bynrap.
Haba kynthoh ïa ki MLA u President ka KSU u la ong, “shisien san snem ki leit tied ïa ki jingkhang iing jong ki paidbah hynrei ka ladei ka kamram jong ki ban khmih bniah ïa ka jingeh jong ki paidbah, la ka long ïa ki samla pule, ïa ki nonghikai bad ha baroh ki mat ba ki ju pynsngew. Lada kita ki nongthawaiñ ki shim ïa ka san snem kum kita ki snem ka jingleh tamasa nga sngew bha ka jinghiar arsut jong ka jylla ha baroh ki liang ngin sa sakhi nangne shakhmat.”
U la ong ruh ba ka seng shwa ban leit ai jingkyrshan ïa ki nonghikai kiba ïakhih, ka ladep ban buddien na ka Sorkar ban pynbor ba dei ban pynurlong ïa ki jingdawa jong ki nonghikai.
