Shillong, Risaw 02: Ka Garo Enlightenment Society (GES) kaba ha Resubelpara ka la pynpaw ïa ka jingsngewkhia halor ha ka projek shna surok kaba lah ban pynsniew dur bad pynjaboh ïa ka wahduid kaba rit kaba don ha ka shnong Upper Rongjeng, East Garo Hills.
Kane ka Wahduid kaba jngai tang kumba 1 metre na ka National Highway 217 bad kaba ïar kumba 250m, ka dei ka Wahduid kaba kongsan bha kaba sam ïa ka umbam umdih bad kumjuh ruh kaba ai jingim ïa ki dohum dohwah kiba don ha kane ka wah bad kumjuh ruh ïa ki jingthung jingtep.
Kane ka projek surok, na Dainadubi sha Darugre, ka dei kaba la peit, pynïaid bad pyntrei da ka National Highways Authority of India (NHAI) bad ka contractor ka Allone Infra Pvt Ltd, haba shen ka lah ban pynjulor ïa ki jingthung, ki dohum dohwah kiba im ha kane ka Wahduid, kaba lah ruh ban pynkylla ïa ka jingtuid jong ka um, bad kan ktah ïa ka sawdong sawkun, kynnoh ka GES ha ka shithi.
Ka GES ka la ong ba kane ka project ka la pynkheiñ ïa ki aiñ ka sawdong sawkun (environmental laws) kum ka Environment (Protection) Act 1986 bad ka Water (Prevention and Control of Pollution) Act 1974. Ka GES ka la kdew ruh shaphang ka National Green Tribunal (NGT) Act 2010. Ki Project kiba kum kine ki donkam ïa ka Environmental Impact Assessment (EIA) kaba dei bad ka jingpynlong ïa ki jingïasyllok bad ki paidbah khnang ban lah ban kiar ïa ki jingpynjulor ïa ka mariang bad ka sawdong sawkun, ka la bynrap.
