Shillong, Risaw, 02: Ka World Tourism Day ka long ka sngi kaba kyrpang na ka bynta ki riew paidbah, ki jaka pule, ki jaka trei, ki nong sengkam, ki nongaikam kiba ïadei bad ki kam jngohkai pyrthei.
Kumba ju leh manla u snem, ha kane ka kynti ruh, ka Department of Tourism and Travel Management jong ka ICFAI University Meghalaya ka la rakhe ïa kane ka sngi da kaba pynlong ïa ka programme kaba kyrpang ha ka shnong Mawlyndep, Ri-Bhoi District ha ryngkat ka jingïatrei lang bad ka India Tourism Shillong, kaba hap hapoh ka jingkhmih jong ka Ministry of Tourism ka Sorkar India.
La ïashim bynta ha kane ka jingrakhe da ki samla pule jong ka University bad ki paidbah nongshong shnong jong ka shnong Mawlyndep, ha ryngkat ka jingdonlang jong ka Vice Chancellor ka University ka Dr. Alicia Gatphoh, u Rangbah Shnong u Bah J. Kharbuki bad u MLA barim ka Umsning u Bah Jason Sawkmie Mawlong uba la long kum u Kongsan ha kane ka sngi ryngkat ka jingdon lang jong u Bah Ian A. Lyngdoh, u President ka West Jaintia Hills District Adventure Sport and Mountaineering Club u Bah Sambor Surong bad kiwei kiwei.
La pynshongkun shuh shuh ïa ka sngi lyngba ki jingshad bad ki jingrwai ba la shna kyrpang da ki samla pule ka University bad ruh da ka jingrwai kyrpang jong i heprit Judy H Syiemiong.
Ha kane ka sngi la pynlong pat sa ïa ka jingpynkhuid shnong kum shi bynta ka jingrakhe ïa ka Swaachta Hi Seva bad ruh ka jingthung ïa ki tynrai dieng kum ka dak ban pynsah jingkynmaw ïa ka NSS Foundation Day da ki samla pule jong ka University.
