Shillong, Risaw, 02: Ka Khasi Students Union (KSU) ha ka sngi Palei ka la dawa ïa ka Sorkar Jylla ba ka dei ban weng noh mardor ïa ka kyrteng jong ka Diya Ghosh bad ka Tanushka Chakravarty na ka thup Unreserved Category kiba la ïoh leit pule MBBS shabar ka jylla lyngba ka State Quota.
“Mano ka Tanushka Chakravarty? Ka dei kaei ba ka Sorkar ka la mang kyrpang ka bhah pule MBBS na ka jylla wat haba dang don ki Khasi kiba kham heh marks? la ong ka KSU ha u kyrwoh ba la phah da u General Secretary u samla Donald V. Thabah.
“Ka KSU ka la ïoh jingtip ba ka Diya Ghosh kaba ïoh NEET Score 472 bad ka Tanushka Chakravarty ka ïoh NEET Score tang 442 ki la ïoh ban leit pule MBBS shabar ka jylla lyngba ka State Quota da kaba rung ha ka Unreserved Category,” la kam ka KSU.
Haba pynshai halor ka Unreserved Category ka KSU ka la ong, “ka Unreserved Category kam dei kaba la mang kyrpang tang ïa ki bar jylla hynrei baroh ki nong Meghalaya kynthup ïa ki Khasi-Jaintia bad Garo. Ka jingrung ha ka Unreserved Category ka dei beit lyngba ka Merit ym na ka Jaidbynriew.”
“Hynrei lada peit pat katkum ka thup ba la pyllait da ka sorkar la shem ba ka don ka jingleh shiliang kaba palat ïa ki samla pule Khasi kiba thrang ban pule MBBS. Lada peit katkum katei ka thup yn shem bun ki Khasi kiba kham heh ka NEET Score ban ïa kitei ki ar ngut ki bar jylla kaba mut ba ki dang don hok shibun ngut ki samla pule Khasi ban rung ha ka Unreserved Category ban ïa kine ki bar jylla,” la ong ka KSU.
“I Rikor Nongkynrih i dei ban don ha ka Unreserved Category, ka Tanushka ka dei ban don ha ka Waiting List jong ka Unreserved Category. I Rikor Nongkynrih i dei ban dn ha ka serial number 13 jong ka Unreserved Category bad ka Diya Gosh ka dei ban don ha ka serial number 14 jong ka Unreserved Category kaba mut sa iwei i khynnah Khasi ban ïoh rung noh ha ka Khasi-Jaiñtia Category lada kyntiew ïa i Rikor sha ka Unreserved Category kumba dei ka kyndon. I Rikor iba kham heh score ban ïa ka Diya Ghosh bad ki don haduh hynniew ngut ki Khasi kiba kham heh score ban ïa ka Tanushka Chakravarty. Kaba mut lada ar ngut ki Khasi kiba dei hok ban ïoh rung ha ka Unreserved Category ki ïoh ban rung ha kane ka Category ka mut sa ar ngut ki Khasi kiba na ka Waiting List jong ka Khasi-Jaintia Category kin ïoh rung ha ka Khasi-Jaintia Category. Pynban ka Sorkar Meghalaya ka la pynkheiñ ïa ki kyndon da kaba pynrung be-aiñ ïa kitei ki ar ngut ki bar jylla kaba pynduh lad bad pynduh ïa ka hok jong ar ngut pat ki samla pule Khasi,” la kynthoh ka seng.
“Hato kane ka dei ka jingbakla ba shida ka sorkar ne ka dei ka jingbym biang ki ophisar ka tnad Health ne ka dei ka jingleh khnang ban pynhun ïa ki bahaiing jong ka Tanushka kiba lah ban don ka jingïadei kaba jan bad ki heh sorkar,” la buh jingkylli ka seng.
Ka KSU kam lah ban pdiang da lei lei ruh em ïa kane ka jingleh shiliang bad jingleh beain ka sorkar ïa ka hok ki samla pule Khasi. Ka seng ka shim ba kane ka dei ka jingiuh roit ïa ka hok ki samla pule Khasi bad kum kane ka jingleh ka sorkar ka pyning khong ïa ka mynsiem ki dkhot ka KSU, la bynrap u kyrwoh.
“Ka KSU ka dawa ba ka Sorkar ka dei ban weng mardor ïa kitei ki bar jylla bad ban thep mar mar da ki samla pule Khasi ba dei hok. Kane kam dei ka sien kaba nyngkong ba ka sorkar ka leh donbor ïa ka hok ki samla pule Khasi, ka la jia teng ha u snem 2020 ha ka tnad Agriculture ruh ha kaba ka KSU ka hap ban tuklar ban pynïoh ïa ka hok ki samla pule Khasi,” la ong u kyrwoh bad bynrap, “lada ka Sorkar kam weng mardor ïa kitei ki bar jylla ka KSU kan hap ban mih madan ban pynbor ïa ka Sorkar ban ai ïa ka hok ki samla pule Khasi.”
