Shillong, Risaw, 02: Ka Khasi Students Union (KSU), South West Khasi Hills District ka la ai por shi bnai ïa ka tmnat Pule Puthi jong ka Sorkar Jylla ban bhah nonghikai ha Nongrim Warding Goverment Lower Primary School namar naduh ba khlad uwei na ki nonghikai la shu phah nongïarap ne volunteer ban ai hikai ïa ki khynnah skul.
Kane ka jingaipor jong ka KSU ka long hadien ka jingïoh jingujor na ki kmie ki kpa bad lyngba ka jingiarap jong ka KSU Lawbah Border Area Circle ki la ïoh jingtip ba ka Nongrim Warding Goverment Lower Primary School ka la shah ieh khunswet khlem da don ki nonghikai ban hikai ïa ki khynnah skul.
La ong ruh ba ïa kane ka skul la seng naduh u snem 1972 bad ka jingdon ki khynnah skul ka la kynjoh palat 50 ngut bad ka jingdon briew ha ka shnong Nongrim Warding ka long kumba 360 tam eiei.
Ka KSU ka la lap ba ka jingbymdon shuh u nonghikai ka dei naduh ka taïew ba nyngkong jong u bnai Jylliew, 2025 ha kaba u la khlad noh na kane ka sla pyrthei bad hadien kata na ka liang jong ka School Managing Committee (SMC) ka la shu phah nongïarap ban hikai hapoh kane ka skul.
Ka seng ka la kynthoh ba ka jingbym bhah nonghikai ha Nongrim Warding Goverment Lower Primary School ka dei ka jingbym don jingkitkhlieh ki nongmihkhmat bad ka Sorkar lyngba ka tnad Pule Puthi.
Ka KSU, lyngba u Education Secretary u samla Evansroy Nongrem ka la pynpaw ka jingsngewdiaw hadien ba la ïoh jingtip na u Rangbah Shnong u Bah K. Sohtun hadien ka jingkhlad noh u nonghikai, ka skul kan shym don shuh ki nonghikai ban hikai ïa ki khynnah la kumba saw bnai eiei kane bad kane ka la wahrah ka jingduhnong kaba khraw ïa ki khynnah skul.
“Ban ym don ka jingduh nong ïa ki khynnah skul, ka shnong lyngba ka Managing Committee kam banse ban phah ïa ki ar ngut ki nonghikai Volunteers da ka jingsiew tulop hi na ka Managing Committee,” la ong ka seng.
U Rangbah Shnong ula dep ban ïakren ruh bad u MLA ka thaiñ ba un tuklar lem halor kane ka bynta hynrei haduh mynta ka dang sah kumjuh.
