Shillong, Risaw, 03: U President ka seng Congress u Bah Vincent H Pala u la takraiñ tyngeh ïa ka Sorkar ba ïalam da ka National People’s Party (NPP) da kaba kynnoh ba ka shaniah ha ka “ka pisa dewïong beaiñ” na ka bynta ka jingkhaïi kulai ban pynneh ïa ka bor hapoh jylla.
U la pynpaw ïa kane haba kdew ïa ka jingleit pynïasoh jong ki saw ngut ki MLA ka Congress sha ka NPP kiba kynthup ïa u Dr. Celestine Lyngdoh (Umsning), u Bah Ronnie V. Lyngdoh (Mylliem), u Bah Gabriel Wahlang (Nongstoiñ) bad u Bah Charles Marngar (Mawhati).
U Bah Pala u la kynnoh ba ka jingïatreilang jong ka NPP bad ka BJP ka long kaba skhem bha ha ka jingkhaïi dewïong beaiñ, ha kaba baroh kiba don ha ka Sorkar, naduh kiba heh haduh kiba rit, ki donkti ha ka kam khaïi dewïong.
U la kynnoh ruh, ban shalan ïa u dewïong na rilum Jaiñtia sha Guwahati, donkam ban siew da ka pisa kaba heh bha, kaba leit sha ka kynhun synrop kaba synshar.
“Ka dei ka kam buhrieh kaba lah paw, lada phi rah ïa kawei ka trok dewïong na rilum Jaiñtia sha Guwahati, phin hap ban siew da ka pisa kaba heh bha na ka bynta kata, kumta ka dei ka jingbuhrieh kaba paw ba baroh u dewïong la die pylleiñ pylleiñ. Kumta nga shem ba ym don eiei shuh ban buhrieh. Tang kawei, lehse ki lad pathai khubor, kim ju leh ïa la ka karmram kaba biang. Nga tharai ïa kane la pynpaw ruh da u Dr. Celestine Lyngdoh ha ka Iingdorbar Thawaiñ. Bad mynta lehse, kaei kaba nga la tip ba kito ki briew kiba kren heh bha ha ka dorbar, mynta, ki dei ki bynta jong kita ki jingïakhaïi beaiñ. Kumta dei na kata ka daw ba nga pyrkhat ba mynta ka dei ka jingbuhrieh kaba paw ba u dewïong be-aiñ u la die pylleiñ pylleiñ. Kaei kaba ki (Myntri) ki la kren namar ka jingjah jong u dewïong na ka jingrong ka um slap kine ki long tang ki jingaidaw. Baroh ki tip ba u slap um da jur than,” la ong u Bah Pala.
U Bah Pala u la bynrap ruh da kaba ong, “ym tang ki kyrteng kiba heh wat ki kyrteng kiba rit baroh ki briew kiba don ha ka sorkar ki donkti ha ka kam khaïi dewïong naduh ki nongtrei jong ka NPP bad ka BJP ryngkat baroh ki donkti ha kata.”
